დანიამ, ფინეთმა და კანადამ უკრაინას ნება დართეს, გამოიყენოს მათ მიერ მიწოდებული იარაღი რუსეთის ტერიტორიაზე სამიზნეებზე დასარტყმელად.
როგორც დანიის პრემიერ-მინისტრმა მეტე ფრედერიკსენმა განაცხადა, უკრაინას შეუძლია, გამოიყენოს მისთვის მიწოდებული იარაღი რუსეთზე დარტყმისთვის, თუ ეს შეესაბამება საერთაშორისო კანონმდებლობას.
კანადის საგარეო საქმეთა მინისტრმა მელანი ჯოლიმ აღნიშნა, რომ უკრაინას შეუძლია კანადური იარაღით თავდასხმები განახორციელოს რუსეთის ტერიტორიაზე, რადგან კანადას უკრაინისთვის არ დაუყენებია რაიმე პირობა მისი იარაღის გამოყენებასთან დაკავშირებით.
ფინეთის საგარეო საქმეთა მინისტრმა ელინა ვალტონენმა 29 მაისს განაცხადა, რომ ისინი არ ზღუდავენ უკრაინას რუსეთის ტერიტორიაზე ფინური იარაღით დარტყმების განხორციელებაში.
მანამდე მსგავსი გადაწყვეტილება მიიღეს პოლონეთმა, დიდმა ბრიტანეთმა და შვედეთმა. პოლონეთის თავდაცვის სამინისტროს უფროსის მოადგილე ცეზარი ტომჩიკმა განაცხადა, რომ კიევისთვის მიწოდებულ პოლონურ იარაღზე „ასეთი შეზღუდვები“ არ არსებობს.
