საქართველოს თასის ფინალამდე, სოციალურ ქსელებში გავრცელებული ვიდეოს გამო საფეხბურთო კლუბი “საბურთალო” ბოდიშს იხდის. როგორც კლუბის ადმინსიტრაციის მიერ ფეისბუქით გავრცელებულ განცხადებაშია აღნიშნული, ვიდეორგოლის ერთადერთი მიზანი გულშემატკივრობის წახალისება იყო.
“რადგან ფინალამდე გავრცელებულ ვიდეო მიმართვას, საზოგადოებაში არაერთგვაროვანი გამოხმაურება მოჰყვა, საჭიროდ ვთვლით, გავაკეთოთ მცირე განმარტება. პირველ რიგში, ვიდეორგოლის ერთადერთი მიზანი ჩვენი გულშემატკივრობის წახალისება იყო და ემსახურებოდა მხოლოდ სპორტულ ინტერესს. ჩვენი მხრიდან, ბოდიშს ვუხდით ყველა იმ გულშემატკივარს, ვისთვისაც ვიდეო მიმართვა ემოციური და სენსიტიური აღმოჩნდა. საფეხბურთო კლუბ საბურთალოსა და დინამო ბათუმს შორის საქმიანი თანამშრომლობა და მეგობრობა წლების განმავლობაში გრძელდება. ჩვენი პაექრობა მხოლოდ მოედანზეა და შეჯიბრის პრინციპიც მხოლოდ სპორტულია. ვადასტურებთ პატივისცემას ჩვენი მეტოქისა და მათ გულშემატკივრის მიმართ, ჩვენს გულშემატკივარს კი ველოდებით თასის ფინალში, ერთად შევქმნათ საფეხბურთო ზეიმი მიხეილ მესხის სტადიონზე,” – წერია გავრცელებულ განცხადებაში. ცნობისთვის, გუშინ კლუბის მხარდამჭრების მონაწილეობით სოციალურ ქსელში ვიდეო გავრცელდა, რომლის შინაარსიც საზოგადოების მწვავე კრიტიკის საგანი გახდა. „აჭარა აჭარლებს, თასი რჩება თბილისში“ – ამ ფრაზას იმეორებდნენ ვიდეოში მონაწილე პირები.
