უკრაინის მოქალაქეებს საქართველოში უვიზოდ დარჩენა შემოსვლიდან ერთი წლის განმავლობაში შეეძლებათ. ამის შესახებ საქართველოს მთავრობის ახალ დადგენილებაშია ნათქვამი.
ამასთან, დადგენილების მიხედვით, უკრაინის იმ მოქალაქეებს, რომლებიც 2025 წლის 24 თებერვლამდე შემოვიდნენ და იმყოფებოდნენ საქართველოში, ყოფნის უფლება გაუგრძელდებათ 2026 წლის 24 თებერვლამდე.
„იმ ქვეყნების ჩამონათვალის დამტკიცების შესახებ, რომელთა მოქალაქეებსაც შეუძლიათ საქართველოში უვიზოდ შემოსვლა“
საქართველოს მთავრობის 2015 წლის 5 ივნისის №255 დადგენილებაში ცვლილების შეტანის თაობაზე
მუხლი 1
„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის შესაბამისად, „იმ ქვეყნების ჩამონათვალის დამტკიცების შესახებ, რომელთა მოქალაქეებსაც შეუძლიათ საქართველოში უვიზოდ შემოსვლა“ საქართველოს მთავრობის 2015 წლის 5 ივნისის №255 დადგენილებაში (www.matsne.gov.ge, 08/06/2015, 010120000.10.003.018640) შეტანილ იქნეს ცვლილება და დადგენილებით დამტკიცებული დანართის შენიშვნის:
1. 11 პუნქტი ამოღებულ იქნეს.
2. მე-4 პუნქტს დაემატოს შემდეგი შინაარსის მე-5 და მე-6 პუნქტები:
„5. უკრაინის მოქალაქეებს აქვთ საქართველოში უვიზოდ შემოსვლისა და სრული 1 წლის ვადით ყოფნის უფლება.
6. უკრაინის იმ მოქალაქეებს, რომლებიც 2025 წლის 24 თებერვლამდე შემოვიდნენ და იმყოფებოდნენ საქართველოში, ყოფნის უფლება გაუგრძელდეთ 2026 წლის 24 თებერვლამდე.“.
მუხლი 2
1. დადგენილება, გარდა ამ დადგენილების პირველი მუხლის მე-2 პუნქტით გათვალისწინებული შენიშვნის მე-6 პუნქტისა, ამოქმედდეს გამოქვეყნებისთანავე.
2. ამ დადგენილების პირველი მუხლის მე-2 პუნქტით გათვალისწინებული შენიშვნის მე-6 პუნქტი ამოქმედდეს გამოქვეყნებისთანავე და გავრცელდეს 2025 წლის 24 თებერვლიდან წარმოშობილ სამართლებრივ ურთიერთობებზე. - ნათქვამია დადგენილებაში.
შეგახსენებთ, 2024 წლის 23 აპრილს მიღებული ცვლილებით, უკრაინის მოქალაქეებს საქართველოში უვიზოდ შემოსვლისა და სრული სამი წლის ვადით ყოფნის უფლება ჰქონდათ. ახალი დადგენილებით, აღნიშნული ჩანაწერი ერთი წლის ვადით ჩანაცვლდა.
