ჯანმრთელობის დაცვისა და სოციალურ საკითხთა კომიტეტმა საზედამხედველო საქმიანობის ფარგლებში, ჰოსპიტალური სერვისების დაფინანსების რეფორმასთან დაკავშირებით, ბოლო გასვლითი შეხვედრა ზუგდიდში გამართა.
შეხვედრაზე სამეგრელოსა და ზემო სვანეთის კლინიკების წარმომადგენლები იყვნენ მოწვეული.
შეხვედრაში პარლამენტის ჯანმრთელობის დაცვისა და სოციალურ საკითხთა კომიტეტის წევრებთან ერთად, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე მონაწილეობდა.
კანონმდებლებმა და აღმასრულებელი ხელისუფლების წარმომადგენლებმა კლინიკების პასუხისმგებელ პირებს მოუსმინეს და მათ კითხვებს უპასუხეს. ასევე გაიმართა დისკუსია დიაგნოზთან შეჭიდული ჯგუფების (DRG) დაფინანსების მოდელის დადებით და უარყოფით მხარეებზე, შემოთავაზებული მოდელის გაუმჯობესებისათვის საჭირო ღონისძიებებზე.
ჯანმრთელობის დაცვისა და სოციალურ საკითხთა კომიტეტმა აღნიშნული შეხვედრით გასვლითი შეხვედრების ციკლი დაასრულა. შეხვედრებზე, ძირითადად, ჰოსპიტალური სერვისების დაფინანსების რეფორმის შედეგების გაანალიზებაზე იმსჯელეს, რის შედეგადაც კომიტეტი რეკომენდაციებს შეიმუშავებს.
„კომიტეტი და, შესაბამისად, პარლამენტი შეიმუშავებს რეკომენდაციებს სამინისტროს მიმართ, თუ რა მიმართულებებით უნდა გაააქტიუროს მუშაობა, რათა დიაგნოზთან შეჭიდული ჯგუფების დაფინანსების მოდელი უფრო მეტად დახვეწილი იყოს და ზუსტად პასუხობდეს საქართველოს მოქალაქეების და კლინიკების წინაშე მდგარ გამოწვევებს“, - განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარემ ზაზა ლომინაძემ.
ღონისძიება პარლამენტის ჯანმრთელობის დაცვისა და სოციალურ საკითხთა კომიტეტის მიერ, ევროკავშირისა და გაეროს განვითარების პროგრამის (UNDP) პროექტის - „ძლიერი საპარლამენტო ინსტიტუციები საქართველოში“ მხარდაჭერით, გაიმართა.
