ძალიან მნიშვნელოვანი გადაადგილებები მოხდა აღმასრულებელ ხელისუფლებაში. მინდა, სამივე მათგანს დიდი წარმატება ვუსურვო იმ უმნიშვნელოვანეს პოზიციებზე, რომლებსაც დაიკავებენ, – ამის შესახებ საპარლამენტო უმრავლესობის წევრმა, ირაკლი კირცხალიამ განაცხადა.
კირცხალიას თქმით, თითოეული ცვლილება, რომელიც აღმასრულებელ ხელისუფლებაში ხდება, მხოლოდ ეფექტურ მართვაზეა ორიენტირებული.
„ყველას კარგად მოგვეხსენება, რა ეფექტურად ეწოდა გრიგოლ ლილუაშვილი იმ საქმიანობას, რაც მის ფუნქციებში შედიოდა. პრემიერმაც განმარტა, რომ მას ოქტომბერში უფლებამოსილების ვადა ისედაც გადიოდა. რეგიონული განვითარების სამინისტრო ინფრასტრუქტურის სამინისტროს გამოეყო და მას გრიგოლ ლილუაშვილი უხელმძღვანელებს. რეგიონულ ჭრილში ძალიან მნიშვნელოვანია, რომ ცალკე სამინისტრო იყოს, რომელიც უფრო ეფექტურს გახდის რეგიონებთან მუშაობას. გრიგოლ ლილუაშვილს ძალიან დიდი გამოცდილება აქვს რეგიონულ ჭრილში. რაც შეეხება ანრი ოხანაშვილს, საზოგადოებისთვისაც კარგად არის ცნობილი მისი საქმიანობა როგორც საპარლამენტო პოზიციებზე, ასევე იუსტიციის სამინისტროში. ანრი ოხანაშვილისთვის სახელმწიფო უსაფრთხოების სამსახური ძალიან მნიშვნელოვანი და საპასუხისმგებლო პოზიციაა. დარწმუნებული ვარ, ასევე ეფექტურად გააგრძელებს იმ საქმიანობას, რომელიც ახალ თანამდებობაზე დაეკისრება. რაც შეეხება იუსტიციის სამინისტროს, პაატა სალიაც საზოგადოებისთვის ცნობილია, მისი წარსული მოღვაწეობაც იურიდიულ სფეროში და საპარლამენტო საქმიანობაში. ეს მნიშვნელოვანი გადაადგილებებია. თითოეული გადაადგილება და ცვლილება, რომელიც აღმასრულებელ ხელისუფლებაში ხდება და მოხდება, მხოლოდ და მხოლოდ ეფექტურ მართვაზეა ორიენტირებული“, – განაცხადა ირაკლი კირცხალიამ.
კითხვაზე, გრიგოლ ლილუაშვილის მიერ დროზე ადრე პოსტის დატოვება ხომ არ გააჩენს კითხვის ნიშნებს ან ინტერპრეტაციას გამოიწვევს, კირცხალიამ აღნიშნა:
„არ მგონია, რაიმე კითხვის ნიშანი ან ინტერპრეტაცია გამოიწვიოს ლოგიკურად და პრაგმატულად მოაზროვნე საზოგადოებაში. ოპოზიცია რა განცხადებებს გააკეთებს, მმართველი გუნდისთვის ნაკლებად მნიშვნელოვანია“.
საკადრო ცვლილებების თანახმად, ცალკე სამინისტროდ ჩამოყალიბდება რეგიონული განვითარების სამინისტრო, რომელსაც გრიგოლ ლილუაშვილი უხელმძღვანელებს, სახელმწიფო უსაფრთხოების სამსახურის უფროსის თანამდებობაზე პარლამენტს ანრი ოხანაშვილის კანდიდატურა წარედგინება, იუსტიციის მინისტრის თანამდებობას კი პაატა სალია დაიკავებს.
