აშშ ერთგულია NATO-ს ღია კარის პოლიტიკის მიმართ, NATO-ში გაწევრიანების შესახებ ნებისმიერი გადაწყვეტილება მიიღება 31 მოკავშირესა და ასპირანტ ქვეყანას შორის, – ამის შესახებ აშშ-ის პრეზიდენტის ადმინისტრაციის პრესსპიკერმა, კარინ ჟან-პიერმა განაცხადა.
თეთრი სახლის წარმომადგენლის თქმით, როდესაც საქმე უკრაინას ეხება, ვაშინგტონი NATO-ს მოკავშირეებთან და უკრაინასთან დიალოგს აწარმოებს, თუ როგორ არის შესაძლებელი ერთობლივად მოხდეს ევროატლანტიკური ინტეგრაციისთვის უკრაინის სწრაფვის მხარდაჭერა.
„მე არ ვაპირებ დეტალებსა და კერძო საუბრებში შესვლას. ეს პრეზიდენტმა არაერთხელ თქვა: უკრაინამ უნდა გაატაროს რეფორმები, რათა დააკმაყოფილოს იგივე სტანდარტები, როგორც NATO-ს ნებისმიერმა ქვეყანამ გაწევრიანებამდე.
ის ფიქრობს, რომ ეს შეიძლება გაკეთდეს, უკრაინას შეუძლია ამის გაკეთება. კიდევ ერთხელ, ჩვენ ერთგული ვართ და ერთგული ვიყავით NATO-ს ღია კარის პოლიტიკის მიმართ. და ჩვენ ასე გავაგრძელებთ“, – განაცხადა კარინ ჟან-პიერმა.
