სომხეთის საგამოძიებო კომიტეტმა სისხლის სამართლის საქმე აღძრა მას შემდეგ, რაც ინტერნეტში გავრცელდა ვიდეო, რომელიც პრემიერ-მინისტრ ნიკოლ ფაშინიანის მიმართ მკვლელობის მუქარას შეიცავს.
ვიდეოში ჩანს ნიღბიანი მამაკაცი, რომელიც საუბრობს, ხოლო მის უკან კიდევ ოთხი ადამიანი დგას, რომლებსაც ასევე ნიღბები აქვთ და ხელში უჭირავთ AKS-74U ტიპის ავტომატები.
საგამოძიებო კომიტეტმა პრესრელიზში განაცხადა, რომ პირებმა უკანონოდ მიიღეს წვდომა შეზღუდული კომპიუტერული ქსელის მონაცემებზე, რათა ვიდეო პირდაპირ ეთერში გაეზიარებინათ. ვიდეოში ნიღბიანი მამაკაცი ფაშინიანს მიმართავს და ამბობს: „ჩვენ ვიცით, სად და როდის მიდიხართ… თქვენ უნდა აგოთ პასუხი თქვენს ყოველ ნაბიჯზე“.
აღნიშნულ ვიდეოს ნიკოლ ფაშინიანი საარჩევნო კამპანიის დროს გამოეხმაურა.
„მათ ნიღბები გაიკეთეს, თითქოს ძლიერი კაცები იყვნენ. მაგრამ იცით, რატომ ატარებენ ნიღბებს? რადგან როგორც კი მოიხსნიან, დავინახავთ, რომ სწორედ მათ მიატოვეს ჩვენი ჯარისკაცები და გაიქცნენ, შიშით სავსენი. არ გამოვრიცხავ, რომ ისინიც ისროდნენ უკნიდან. წადით, მოიხსენით ნიღბები, გამოდით – მაჩვენეთ, ვინ ხართ. სომხეთში ნიღბებით მოხვედით და ავტომატური იარაღით ვიდეოებს იღებდით? ყველას გიპოვით. მოიხსენით ნიღბები და ნებაყოფლობით წარადგინეთ თავი. ჩვენი შვილები პოზიციებზე მარტო დატოვეთ და გაიქეცით, ნაძირლებო. ფერარის სიჩქარით გაიქეცით – ვინ ხართ თქვენ, რომ ილაპარაკოთ? მოხვიდეთ და გვითხრათ, რომ ჩვენი შვილები გავწირეთ? თქვენ გაიქეცით პოზიციებიდან. ჩვენ თითოეულ თქვენგანს მუხლებზე დაგაყენებთ, პასუხს მოგთხოვთ ჩვენი შვილების მარტო დატოვებისა და გაქცევისთვის“, – თქვა ფაშინიანმა.
