გაფართოების საკითხებში ევროკომისარმა, მარტა კოსმა განაცხადა, რომ ზოგიერთმა კანდიდატმა ქვეყანამ შესაძლოა, ევროკავშირში გაწევრიანებაზე მოლაპარაკებები მიმდინარე ათწლეულის ბოლომდე წარმატებით დაასრულოს.
ევროპული მედიის ცნობით, აღნიშნული განცხადება ევროკომისარმა ევროკავშირის სამუშაო პროცესისა და სამომავლო გეგმების განხილვისას გააკეთა. მარტა კოსის თქმით, გაფართოების პროცესი მიმდინარეობს დამსახურებებზე დაფუძნებული პრინციპით, რაც იმას ნიშნავს, რომ თითოეული ქვეყნის პროგრესი ინდივიდუალურად შეფასდება რეფორმების ტემპისა და შესრულებული ვალდებულებების მიხედვით.
"ჩვენ ვხედავთ რეალურ შესაძლებლობას, რომ ზოგიერთმა კანდიდატმა ქვეყანამ მოლაპარაკებები ამ ათწლეულის ბოლომდე დაასრულოს. თუმცა, ეს სრულად არის დამოკიდებული თვითონ ამ ქვეყნების მზაობაზე, მათ მიერ განხორციელებულ ფუნდამენტურ რეფორმებზე და ევროპული სტანდარტების პრაქტიკულ დანერგვაზე. ჩვენ არავის გავუწვდით ხელს და არც წინასწარ დავწერთ შედეგებს — ყველაფერი დაფუძნებული იქნება ინდივიდუალურ დამსახურებებსა და რეალურ პროგრესზე", — განაცხადა მარტა კოსმა.
ევროკომისარმა ხაზგასმით აღნიშნა, რომ მიუხედავად გეოპოლიტიკური გამოწვევებისა და რეგიონული არასტაბილურობისა, ევროკავშირის კარი ღია რჩება ყველა იმ სახელმწიფოსთვის, რომელიც მზად არის, გაიზიაროს და გაატაროს ევროპული ღირებულებები, კანონის უზენაესობა და დემოკრატიული სტანდარტები.
კანდიდატი ქვეყნებიდან მოლაპარაკებების საბოლოო ფაზამდე მისვლა დამოკიდებული იქნება მათ შიდა რეფორმების ეფექტიანობაზე, განსაკუთრებით მართლმსაჯულების, ანტიკორუფციული მექანიზმებისა და ძირითადი უფლებების დაცვის სფეროებში.
