კიევსა და ოლქში უკრაინის ენერგეტიკაზე ერთ-ერთი ყველაზე მასშტაბური თავდასხმის შედეგად სამშაბათს, 3 ნოემბერს, ელექტროენერგიის ექსტრენული გათიშვები შემოიღეს. საღამოდან დედაქალაქში შეჩერებულია ტრამვაისა და ტროლეიბუსის მოძრაობა, მთელ ქალაქში შეწყვეტილია წყალმომარაგება.
"კიევში ელექტრომომარაგებასთან დაკავშირებით სიტუაცია ძალიან რთულია", — განაცხადა უკრაინის დედაქალაქის მერმა ვიტალი კლიჩკომ. მისი თქმით, ბოლო დღეების თავდასხმების გამო დაზიანდა კიევის რეგიონული ენერგოკვანძის ობიექტები, რის გამოც "უკრენერგომ" ელექტროენერგიის ექსტრენული გათიშვები დააწესა. იმ რაიონებში, სადაც ყველაზე მწვავე სიტუაციაა, იხსნება გათბობის პუნქტები, სადაც შესაძლებელია გათბობა და გაჯეტების დამუხტვა, დასძინა კლიჩკომ.
შეჩერებული მიწისზედა ელექტროტრანსპორტის ზოგიერთ მარშრუტზე ხელისუფლებამ დამატებითი ავტობუსები გაუშვა, განაცხადეს კიევის საქალაქო სახელმწიფო ადმინისტრაციაში. ტრამვაისა და ტროლეიბუსის მოძრაობის აღდგენა ენერგოსისტემაში სიტუაციის სტაბილიზაციის შემდეგ იგეგმება. "მეტროპოლიტენი ამჟამად ჩვეულ რეჟიმში მუშაობს. ამავდროულად, მისი შემდგომი მუშაობა დამოკიდებული იქნება ენერგოსისტემაში არსებულ სიტუაციაზე", — აღნიშნეს საქალაქო ადმინისტრაციაში.
3 ნოემბერს, დღისით, უკრაინის სუმისა და პოლტავის ოლქებში ავარიული გათიშვის სპეციალური გრაფიკები შემოიღეს — რეჟიმები, რომელთა დროსაც მომხმარებლებს ზუსტად ვერ ეუბნებიან, რამდენ ხანს არ ექნებათ ელექტროენერგია.
