დანიის, ლატვიის, ნორვეგიის, ფინეთისა და შვედეთის ყინულის ჰოკეის ეროვნულმა ნაკრებებმა უარი თქვეს მომავალ მსოფლიო ჩემპიონატზე რუსეთის ნაკრებთან თამაშზე, რომელიც ამ სპორტის საერთაშორისო ფედერაციამ (IIHF) ლოზანის სპორტული არბიტრაჟის სასამართლოს (CAS) გადაწყვეტილებით ტურნირზე უნდა დაუშვას. ამის შესახებ Reuters წერს.
"არსებული სიტუაციიდან და დღეისთვის ხელმისაწვდომი ინფორმაციიდან გამომდინარე, ნორვეგია არ ითამაშებს რუსეთის წინააღმდეგ მსოფლიო ჩემპიონატზე, რომელიც 2027 წლის მაისში გერმანიაში გაიმართება. ჯგუფში დანარჩენი მატჩები ჩვეულ რეჟიმში ჩატარდება", — აღნიშნულია ნორვეგიის ჰოკეის ფედერაციის განცხადებაში.
რუსეთთან თამაშზე უარის შესახებ განაცხადეს შვედეთის ჰოკეის კავშირშიც და აღნიშნეს, რომ რიგ სხვა ქვეყნებთან შეთანხმდნენ გადაწყვეტილების ერთობლივად გამოცხადებაზე. ლატვიის ჰოკეის ფედერაციაშიც განაცხადეს, რომ ბოლო დღეებში ერთიანი პოზიციის შემუშავებაზე მუშაობდნენ ფინეთის, ნორვეგიისა და დანიის წარმომადგენლებთან მჭიდრო თანამშრომლობით.
CAS-მა გასული კვირის ბოლოს დააკმაყოფილა რუსეთის ჰოკეის ფედერაციის ერთ-ერთი აპელაცია. IIHF-ში იკისრეს ამ გადაწყვეტილების შესრულების ვალდებულება, თუმცა განაცხადეს, რომ უკმაყოფილონი არიან ამით და ჩამოშორებას აუცილებელ ზომად მიიჩნევენ მონაწილეთა უსაფრთხოების უზრუნველსაყოფად და შეჯიბრებების მთლიანობისა და სამართლიანობის შესანარჩუნებლად.
CAS-ის გადაწყვეტილებით უკმაყოფილება გამოხატეს გერმანიის ჰოკეის კავშირშიც (DEB). "ჩვენი პოზიცია უცვლელი რჩება: ჩვენ წინააღმდეგი ვართ რუსეთის ეროვნული ნაკრებების დაბრუნების საერთაშორისო ჰოკეის ტურნირებზე. ეს გადაწყვეტილება რადიკალურად ცვლის საწყის სიტუაციას გერმანიაში 2027 წლის ყინულის ჰოკეის მსოფლიო ჩემპიონატთან დაკავშირებით. რუსეთის მონაწილეობაზე დაშვებას ჩვენთვის, როგორც მასპინძელი მხარისთვის, მნიშვნელოვანი შედეგები მოაქვს უსაფრთხოების, პოლიტიკისა და ეკონომიკის სფეროებში", — ნათქვამია DEB-ის გამგეობის ხელმძღვანელის, ფრანკ ლუტცის განცხადებაში.
