გაეროს უშიშროების საბჭომ დასავლეთ საჰარაში 35-წლიანი სამშვიდობო მისიის (MINURSO) მანდატის გახანგრძლივება ვერ შეძლო, რის გამოც მისია სრულდება. ამის შესახებ გენერალურმა მდივანმა ანტონიუ გუტერეშმა განაცხადა.
მაროკო, რომელიც რეგიონს საკუთარ ტერიტორიად მიიჩნევს და მის დიდ ნაწილს აკონტროლებს, გადაწყვეტილებას მიესალმება. ალჟირის მიერ მხარდაჭერილი "პოლისარიოს ფრონტი" კი შეშფოთებას გამოხატავს.
მართალია, გაერო დასავლეთ საჰარას არათვითმმართველ ტერიტორიად განიხილავს, თუმცა მაროკოს სუვერენიტეტს აშშ, ისრაელი და კოლუმბია აღიარებენ, ხოლო ზოგიერთი ევროპული ქვეყანა (მათ შორის, ესპანეთი და გერმანია) მაროკოს შემადგენლობაში რეგიონის ავტონომიის იდეას უჭერს მხარს.
მისიის დასრულების მიზეზი უშიშროების საბჭოში წარმოქმნილი უთანხმოებაა.
მიმდინარე წელს რუსეთმა ვეტო დაადო აშშ-ის რეზოლუციას, რომელიც მაროკოს გეგმას უჭერდა მხარს და მშვიდობისმყოფელთა რაოდენობის შემცირებას ითვალისწინებდა. თავის მხრივ, საბჭომ არც რუსეთის ალტერნატიული პროექტი მიიღო მისიის 2027 წლამდე გაგრძელების შესახებ. შედეგად, მანდატის ვადა მიმდინარე წლის 31 ოქტომბერს ამოიწურა.
