დღეს, 7 მაისს, მოსკოვის კრემლში გაიმართება ვლადიმირ პუტინის ინაუგურაცია. 71 წლის პუტინი პრეზიდენტის ფიცს მეხუთედ დადებს. ცერემონია მოსკოვის დროით 12:00 საათზე დაიწყება და რუსეთის ყველა ტელეარხით გადაიცემა.
ოპოზიციის, სამოქალაქო საზოგადოების და დამოუკიდებელი მედიის წინააღმდეგ რეპრესიების პირობებში ჩატარებულ არჩევნებს დასავლეთის სახელმწიფოებმა და საერთაშორისო ორგანიზაციებმა უსამართლო და არათავისუფალი უწოდეს.
რუსეთის პრეზიდენტის ადმინისტრაციის ინფორმაციით, პუტინის ინაუგურაციაზე მიიწვიეს რუსეთში აკრედიტებული დიპლომატიური მისიების ხელმძღვანელები, მათ შორის „არამეგობრული ქვეყნებიდანაც“. რუსეთი, რომელიც ორ წელზე მეტია უკრაინის წინააღმდეგ ომს აწარმოებს, „არამეგობრულად" მიიჩნევს უკრაინის მხარდამჭერ სახელმწიფოებს.
პუტინის ინაუგურაციას არ დაესწრებიან ევროკავშირის წევრ სახელმწიფოთა უმრავლესობის, დიდი ბრიტანეთის და აშშ-ის წარმომადგენლები. სააგენტო dpa ევროკავშირის რამდენიმე დიპლომატზე დაყრდნობით წერს, რომ ინაუგურაციას დაესწრებიან საფრანგეთის, უნგრეთის და სლოვაკეთის წარმომადგენლები, რათა კომუნიკაციის არხები შეინარჩუნონ და რუსეთს არ მისცენ დამატებითი საბაბი დიპლომატიური წესების და ნორმების იგნორირებისთვის.
უკრაინის საგარეო საქმეთა სამინისტრომ 6 მაისს განაცხადა, რომ კიევი ვერ ხედავს სამართლებრივ საფუძველს ვლადიმირ პუტინი აღიაროს რუსეთის დემოკრატიულად და ლეგიტიმურად არჩეულ პრეზიდენტად.
რუსეთში 15-17 მარტს ჩატარებული საპრეზიდენტო არჩევნების ოფიციალური შედეგებით პუტინმა ხმების 87,28% მიიღო. ცენტრალურმა საარჩევნო კომისიამ განაცხადა, რომ პუტინის შედეგი და ამომრჩეველთა აქტივობა(77,44%) რუსეთის უახლეს ისტორიაში „სარეკორდო“ და „უპრეცედენტო“ მაჩვენებელი იყო. რუსეთმა საპრეზიდენტო არჩევნები უკანონოდ ჩაატარა უკრაინის და საქართველოს ოკუპირებულ ტერიტორიებზეც.
