ვის ეკუთვნის საავტორო უფლებები? რატომ დატოვეს საავტორო უფლებათა ასოციაცია GCA, რომლის ხელმძღვანელი გიგა კობალაძეა, ისეთმა ცნობილმა ავტორებმა და შემსრულებლებმა, როგორებიც არიან ნუნუ გაბუნია, რუსა მორჩილაძე, ჯემალ სეფიაშვილი, ნინი ბადურაშვილი და საერთო ჯამში, ასეულობით წევრმა?
რატომ ხდება, რომ თანამედროვევე საბაზრო ეკონომიკის პირობებში, როდესაც ეკონომიკის მთავარი ფუნდამენტი კონკურენცია და კონკურენტუნარიანი გარემოა, გარკვეული ჯგუფის უფლებების დაცვა და არჩევანის თავისუფლება კითხვის ნიშნის ქვეშ დგას?
სამართლებრივად რამდენად გამართულია, თავად პროდუქტის შემქმნელს არ ჰქონდეს უფლება აირჩიოს ორგანიზაცია, თუ ვისთან სურს თანამშრომლობა?
რამდენად გამართლებულია „ერთი ფანჯრის“ პრინციპი იქ, სადაც საქმე ეხებათ შემსრულებლებს, კომპოზიტორებს და ზოგადად ხელოვან ადამიანებს?
ბოლო პერიოდში, საავტორო უფლებების დაცვის თემა დიდი დაპირისპირების საგნად იქცა.
სწორედ ამიტომ, ჩვენ გადავწყვიტეთ, ამ თემის გარშემო ყველა დაინტერესებული მხარის მოსაზრება მოვისმინოთ და შემდეგ ვრცელი მოკვლევა შემოგთავაზოთ.
საავტორო უფლებათა ასოციაცია GCA და მისი ხელმძღვანელი გიგა კობალაძე აცხადებს, რომ ქართველი ავტორების და შემსრულებლების საავტორო უფლებების დაცვა მათ ეკუთვნით ექსკლუზიურად.
თუმცა, შეიქმნა მეორე ანალოგიური ორგანიზაცია, „გერა“, სადაც გიგა კობალაძის ასოციაციიდან ისეთი ცნობილი ავტორები წავიდნენ, როგორებიც არიან ნუნუ გაბუნია, დავით ევგენიძე, ჯემალ სეფიაშვილი, რუსა მორჩილაძე... ისინი მეორე ორგანიზაციაში გადავიდნენ.
მთავარი პრეტენზია, რაც მათ ჰქონდათ GCA-ს ხელმძღვანელთან, თანხების არასწორ განკარგვა-გადანაწილებას უკავშირდება.
სწორედ ამ მიმდინარე მოვლენებზე ვესაუბრეთ გიგა კობალაძეს და თემაზე მუშაობას ისევ ვაგრძელებთ.
სანამ გიგა კობალაძის ინტერვიუს შემოგთავაზებთ, მოკლედ გაგაცნობთ მისი ოპონენტების განცხადებებს...
„რატომ ხდება რომ გიგასგან სულ ვიღებთ , ერთი და იგივე თანხას მრავალი წლის მანძილზე, რატომ ხდება ეს? მე მაგალითად, სტაბილურად, 3 თვის განმავლობაში, ვიღებ 1040–1050 ლარს“ – განაცხადა კომპოზიტორმა ნუნუ გაბუნიამ. მან GCA დატოვა და GERA-ში გადავიდა.
რუსა მორჩილაძე: წლების განმავლობაში კუთვნილის მხოლოდ მემილიონედი მიმიღია საავტორო შემოსავალი. არაფერი იცვლებოდა, მე იურისტი არა ვარ რომ რაღაც ვამტკიცო, მაგრამ ვარ 100%-ით დარწმუნებული, რომ იქ არ იყო კეთილსინდისიერი დამოკიდებულება ყველა ავტორის მიმართ. მე ჩემი სახელით ვლაპარაკობ მაგრამ იცოდეთ, რომ ჩემს აზრზეა ათასობით ადამიანი.
ნინი ბადურაშვილი: ვერაფრით ვხვდებოდი, როგორ შეიძლებოდა სამ თქვეში ერთხელ ან 6 თვეში ერთხელ დამრიცხვოდა მხოლოდ 120 ლარი. რა პრინციპით ითვლებოდა ჰონორარი, ან როგორ ხდებოდა და დღეს რა ხდება თქვეთან? თუ შეიძლება მოგვიყვეთ, როგორ შეიძლებოდა, რომ ყოველთვის ჩემს ანგარიშზე ყოფილიყო 120 ლარი ან 130 ლარი?“
რაც შეეხება თავად გიგა კობალაძეს, ის აცხადებს, რომ თუ საავტორო უფლებების დაცვაში, ერთ სფეროში, რამდენიმე ორგანიზაცია იარსებებს, ეს არაკეთილსინდისიერი კონკურენცია იქნება.
ბატონო გიგა, გთხოვთ განგვიმარტოთ, რატომ აცხადებთ და რატომ დგას საკითხი ისე, რომ მხოლოდ თქვენ გაქვთ ექსკლუზიური უფლება, საავტორო უფლებების დაცვის და რომელი დოკუმენტი, ან საბუთი ადასტურებს ამას?
ეს კანონით არის დარეგულირებული და ჩვენი კანონი შესაბამისობაშია ევროპულ კანონმდებლობასთან, რადგან ევროპაში ყველგან ასეა, რომ სფეროში შესაძლებელია, მხოლოდ ერთი კოლექტიური ორგანიზაციის არსებობა, რაც ნიშნავს შემდეგს, მარტივი ენით, რომ ვთქვათ, მაგალითად მუსიკაში შეიძლება იყოს ერთი, ლიტერატურაში მეორე, ფოტოგრაფიაში მესამე და ასე შემდეგ. არ შეიძლება ერთი და იგივე სფეროში იყოს ორი ერთნაირი ორგანიზაცია, ერთი და იგივე ფუნქციებით, რადგან ეს აზარალებს ორივე მხარეს, როგორც ავტორს, რომელმაც აქედან შემოსავალი უნდა მიიღოს, ასევევ გამომყენებელს, იმიტომ რომ გამომყენებელს უწევს რამოდენიმე ორგანიზაციასთან იურთიერთობოს, რაც მისთვის ძნელია და შესაბამისად, უფრო ძვირი. ავტორს უმცირდება ჰონორარი იმიტომ, რომ ეს ორგანიზაციები ერთმანეთთან არაკეთილსინდისიერ კონკურენციაში შედიან, ხელოვნურად ადიდებენ ფასებს. ევროპაში ამას ეძახიან „ერთი ფანჯრის პრინციპს“ და მთელი ევროპა რეკომენდაციას უწევს, რომ ყველგან იყოს „ერთი ფანჯრის პრინციპი“. ეს ასეა ჩვენს კანონშიც.
შეგიძლიათ მითხრათ, რომელი კანონი კრძალავს კონკურენციას?
კანონი საავტორო და მომიჯნავე უფლებების შესახებ, 63-ე მუხლი, სადაც პირდაპირ წერია, რომ შესაძლებელია შეიქმნას ასეთი ორგანიზაცია, მხოლოდ სფეროების მიხედვით. ასევე არის ამავე კანონის იგივე მუხლში ჩაწერილი, რომ ორგანიზაციას, რომელსაც სურს, რომ შეასრულოს კოლექტიური მართვის ფუნქციები, ანუ გასცეს ლიცენზია და შეაგროვოს ჰონორარი და შემდგომ გაანაწილოს, უნდა ჰქონდეს გაფორმებული ურთიერთწარმომადგენლობის ხელშეკრულება მსოფლიოს უმრავლეს ქვეყნების ანალოგიურ ორგანიზაციებთან. ეს ნიშნავს იმას, რომ ასეთი ურთიერთწარმომადგენლობითი ხელშეკრულება თუ არა აქვს ორგანიზაციას 50%- ზე მეტ ქვეყანასთან მსოფლიოში, ვისთანაც კოლექტიური მართვა არსებობს, მას არა აქვს საკმარისი ლეგიტიმაცია, რომ მივიდეს გადამხდელთან და მოითხოვოს ჰონორარი.
ჩვენ წარმოვადგენთ არა მარტო ადგილობრივ შემსრულებლებს და ავტორებს, არამედ მთელ მსოფლიოს. ამერიკელებს, გერმანელებს, ფრანგებს და ასე შემდეგ. თუ ჩვენ მათთან არ გვაქვს ხელშეკრულება, ანუ თუ მათ არ აქვთ მოცემული ჩვენთვის უფლება, რომ წარმოვადგინოთ საქართველოში მათი ავტორები, ისევე როგორც არ გვაქვს მიცემული უფლება, რომ მათ საკუთარ ქვეყნებში წარმოადგინონ ქართველი ავტორები, მაშინ ლეგიტიმაციის პრობლემა დგება. ამიტომაც, კანონმა ეს შეზღუდვა დააწესა, რომ თუ არ არის 50%-ზე მეტ ქვეყანასთან გაფორმებული ასეთი ხელშეკრულება, ასეთ ორგანიზაციას არა აქვს უფლება შეასრულოს კოლექტიური მართვის ფუნქციები. ეს ორი შესზღუდვა არსებობს. ამ ორ შეზღუდვას ჩვენ ვაკმაყოფილებთ სრულად, იმიტომ რომ გვაქვს დაახლოებით 250 -ზე მეტ ორგანიაციასთან მსოფლიოში გაფორმებული მუსიკის სფეროში და კანონი მეორეს შექმნას არ ითვალისწინებს.
სხვათაშორის ეს რომ ასეა ადასტურებს საქპატენტი, ინტელექტუალური საკუთრების ეროვნული ცენტრი, სახელმწიფო ორგანო, რომელიც განსაზღვრავს საავტორო უფლებათა პოლიტიკას სახელწიფოში და ასევევ ჩვენი ტიპის ორგანიზაცია ანგარიშვალდებულია მის წინაშე, ყოველწლიურად ვაბარებთ ანგარიშს და ერთგვარი ზედამხედველი ორგანოა კოლექტიური მართვის ორგანიზაციების. საქპატენტი ოთხჯერ ადასტურებს წერილობით და საჯაროდაც მათ შორის, რომ კანონით შესაძლებელია შეიქმნას სფეროს მიხედვით მხოლოდ ერთი.
დღეს, როდესაც მსოფლიო ბაზარი კონკურენციის პირობებზეა აწყობილი, თქვენს გარდა სხვა ორგანიზაცია არ შეიძლება არსებობდეს?
სწორედ მაგაშია საქმე, რომ კონკურენცია ამ სფეროში დამაზარალებელია.
ვთქვათ მე არ მომწონს თქვენთან თანამშრომლობა, როგორც ავტორს, როგორც შემსრულებელს, არ უნდა მქონდეს უფლება სხვასთან ვითანამშრომლო?
როგორ არა, თქვენ გაქვთ უფლება სხვასთან ითანამშრომლოთ, თქვენ შეგიძლიათ ინდივიდუალურად გააკეთოთ ეს, მაგრამ, უბრალოდ გაგიჭირდებათ, რადგან მთელ მსოფლიოში მილიონი გამომყენებელია და მილიონ გამომყენებელთან უბრალოდ ვერ იზამ ამას. ან მეორე, ჩვენი ტიპის ორგანიზაცია არის წევრობაზე დაფუძნებული ორგანიზაცია, შესაბამისად, გადაწყვეტილებები ამ ორგანიზაციაში მიიღება ისევე, როგორც მიიღება ნებისმიერი წევრობაზე დაფუძნებულ ორგანიზაციაში. ამ ორგანიზაციის მუშაობა თუ არ მოსწონთ წევრებს, ესეც გაწერილი პროცედურაა, შეუძლიათ შეცვალონ ორგანიზაციის მენეჯმენტი, მოითხოვონ ცვლილებები, დაინტერესდნენ რა ხდება და ასე შემდეგ. ძალიან დემოკრატიული მართვაა, ჩვენ არჩეულები ვართ გარკვეული ვადით და ამ ვადის გასვლის შემდეგ, შეუძლიათ აირჩიონ სხვა, ვინც უკეთ გააკეთებს ამ ყველაფერს, თუმცა დღემდე მსგავსი რამ, არ მომხდარა. გვირჩევენ, იმიტომ რომ ჩვენს საქმიანობას რომ შეხედოთ 19 წლის განმავლობში, დაახლოებით 22-ჯერ გაიზარდა შემოსავალი, ვიდრე იყო მანამდე და რატომ უნდა იყვნენ უკმაყოფილოები, ვერ ვხვდები.
თუმცა, ფაქტია ისიც, რომ თქვენი ორგანიზაცია ორასზე მეტმა წევრმა დატოვა...
2 ათასიდან.
ფაქტია რომ უკმაყოფილოები არიან.
მათ შეუძლიათ, ეს უკმაყოფილების მიზეზები, ამავე ორგანიზაციაში გაარკვიონ, დაასაბუთონ, და თუ კი მათი პრეტენზიები საფუძვლიანია, ეს პრეტენზიები დაკმაყოფილდება. საქმე იმაშია, რომ მათი პრეტენზიები არ არის საფუძვლიანი. სამი წლის განმავლობაში 114 ადამიანიდან არცერთს გასჩენია სურვილი, რომ ეს პრეტენზია დაესაბუთებინა, რადგან ეს ყველაფერი ცოტა სხვა მხრივ იმართება, წმინდა ფინანსური თვალსაზრისით და მათ ნაკლებად აინტერესებთ პოლიტიკური სარჩული, ამ ყველაფრის უკან რა დგას. თუმცა, არიან იქ ადამიანები, ძალიან ცოტა, დაახლოებით 5-7, ვინც განზრახ აკეთებს ამას და მათ ძალიან კაგად იციან, რომ 3 წელია კანონის საწინაამდეგოდ მოქმედებენ. ეს სცენარი, სხვათა შორის, არ არის პირველი და არც უკანასკნელი იქნება ალბათ, სამწუხაროდ.
სხვათა შორის, არიან ადამიანები, როგორც ახსენეთ, რომლებიც ფინანსური თვალსაზრისით იყვნენ უკმაყოფილო. მათ შორის, ჩემთვის ძალიან საპატივცემლო კომპოზიტორი ქალბატონი ნუნუ გაბუნია აცხადებს, რომ წლების განმავლობაში თვეში 300 ლარს იღებდა რეგულარულად.
ასე არ ყოფილა, ყველა ავტორი დღემდე იღებს იმდენს, რამდენიც უგროვდება. ერთადერთი იყო პანდემია, ავტორებს რომ არ შემცირებოდათ ჰონორარი, იმიტომ რომ თითქმის დაკეტილი იყო ყველაფერი, პანდემიამდე რა ჰონორარიც ჰქონდათ, ის დავუფიქსირეთ და მთელი პანდემიის განმავლობაში, მიუხედავად იმისა, რომ ჩვენ ვერ ვაგროვებდით და თითქმის გაგვინახევრდა შემოსავალი, ქართველ ავტორებს არ დავაკელით და მივეცით ზუსტად იმდენი, რამდენსაც პანდემიამდე იღებდნენ.
ეს მარტო ჩვენ კი არ გავაკეთეთ, მთელი მსოფლიო ამაზე შევთანხმდით, რომ პირველ რიგში ვიზრუნებდით, ჩვენს ადგილობრივ ავტორებზე, რომ მათ არ შემცირებოდათ ჰონორარი და ამიტომ იყო ის წელიწადნახევარი ერთი და იგივე თანხა ერიცხებოდათ. პანდემია ახლა დასასრულისკენ რომ წავიდა, მარტიდან ჩვენ უკვე გადავედით, დავუბრუნდით ძველ რეჟიმს და ავტორები იღებენ იმდენს, რამდენიც რეალურად უგროვდებათ. პრინციპში გამოდის, რომ მეტი მივეცით, ვიზრუნთ იმაზე რომ არ დაკლებოდათ.
თქვენ ეს ყველაფერი აუხსენით ქალბატონ ნუნუ გაბუნუას და მან მაინც ასეთი განცხდება გააკეთა?
მისი ეს განცხადება არ ვიცი რითი იყო განპირობებული, თუმცა ეს ახსნილი იყო ყველასთვის, ინდივიდუალური საუბრების დონეზე, მხოლოდ საჯარო განცხადებები კი არ გავაკეთეთ... მაგალითად თუ იღებდნენ პანდემიამდე პირობითად 100 ლარს, ახლა მიიღებდნენ 50 ლარს, იმიტომ რომ განახევრდა შემოსავალი და რატომ თქვა ეს ქალბატონმა ნუნუმ, არ ვიცი.
კიდევ ერთი ძალიან ცნობილი მუსიკოსი, დათო ევგენიძე აცხადებს, რომ ის საკუთარი აზრის დაფიქსირების გამო გარიცხეთ ორგანიზაციიდან, რამდენად მართალია ეს ინფორმაცია? დათო ევგენიძე მართლა გარიცხეთ?
როდესაც ეს ამბავი დაიწყო, 2019 წლის თებერვლის ბოლოს, როდესაც შეიქმნა ეს არალეგარული მეორე ორგანიზაცია, დაახლოებით იმ 114 ადამიანიდან ვინც წავიდა, თითქმის ყველამ საკუთარი განცხადებით მოგვმართა წერილობით და გავიდნენ წევრობიდან. რაც შეეხება დათო ევგენიძეს და კიდევ ორი თუ სამი ავტორი იყო, რომლებთან მიმართებაში ჩვენ მივიღეთ გადაწყვეტილება, კი არ გავრიცხეთ, არამედ შევუწყვიტეთ უფლებამოსილება, იქიდან გამომდინარე, რომ არღვევდნენ წესდებით გათვალისწინებულ განაწესებს.
წესდებაში წერია, რომ ამ ოგანიზაციის წევრი როდესაც ხარ, არ შეიძლება შენ ამ ორგანიზაციის საწინააღმდეგო ქმედებები განახორციელო. ბატონი დათო ევგენიძე, რაც გადავიდა იმ ორგანიზაციაში, ბევრჯერ საჯაროდ, უხეშად რომ არ გამომივიდეს, ლანძღავდა ამ ორგანიზაციას, ოღონდ ლანძღავდა არა იმ კუთხით, რომ დავუშვათ, ვერ მუშაობს ეს ორგანიზაცია კარგად, არამედ ძალიან ცუდი კუთხითაც, რო ეს ორგანიზაცია რაღაც ფულს ითვისებს, ავტორების შემოსავალს არასწორად ანაწილებს... ამის საფუძველზე, მას და კიდევ რამდენიმე ადამიანს შევუწყვიტეთ უფლებამოსილება. დანარჩენმა იმ 114-დან, ყველას განცხადება დევს ჩვენთან, რითაც ითხოვენ უფლებამოსილების შეწყვეტას.
სხვათა შორის, თანხების არაკეთილსინდისიერ გადანაწილებაზე, საკმაოდ ხმამაღალი განცხადება გააკეთა რუსა მოეჩილაძემაც, ისიც გარიცხეთ თუ საკუთარი ნებით დატოვა ორგანიზაცია?
არ მახსოვს რუსას შემთხვევა, შევუწყვიტეთ უფლებამოსილება თუ განცხადებით მოგვმართა, მაგრამ ისიც ამბობდა, რომ თითქოს არაწორად ვანაწილებდით. ეს არის მხოლოდ სიტყვები, იმიტომ რომ ჩვენ ყოველწლიურად ვაქვეყნებთ ანგარიშს, ამ ანგარიშს ვუგზავნით საქპატენტს, საეთაშორისო ორგანიზაციებს და ამას თავი რომ გავანებოთ, ყველა ავტორს ვუგზავნით იდივიდუალურად, საიდან რამდენი შეგროვდა, როდის შეგროვდა და და ასე შემდეგ.
გარდა ამისა, ყველა წევრს აქვს საკუთარი ონლაინ კაბინეტი, სადაც შეუძლიათ ყველაფერი დეტალურად ნახონ. ჩვენ ამ ვალდებულებას ბუნებრივია ვასრულებთ და ვასრულებთ კეთილსინდისიერად, ვაგროვებთ ამ ჰონორარს და ვუნაწილებთ ყველას. ასეთი ურთიერთობა ჩვენ გვქონდა „რაოსთანაც“, მაგრამ სამწუხაროდ „რაო“, რომელიც არის რუსული ორგანიზაცია, ხელშეკრულების პირობებს კეთილსინდისიერად არ ასრულებდა, ანუ ჩვენ ვაგროვებდით საქართველოში რუსი მომღერლების ჰონორარს და ვურიცხავდით „რაოს“, როგორც ეს ხელშეკრულებით იყო დადგენილი.
მგონი, ორჯერ უფრო მეტს ურიცხავდით რუსულ ორგანიზაცია „რაო-ს, ვიდრე იქიდან საქართველოში ირიცხებოდა, ერთ-ერთ განცხადებაში თქვით ეს..
დიახ, ორჯერ და შეიძლება მეტსაც, ვურიცხავდით იმას, რაც გროვდებოდა. მოდი ასე ვთქვათ, ჩვენ არ ვმალავდით და არ ვიტოვებდით ამ თანხას, ვაძლევდით რაც მათი კუთვნილი ფული იყო, არც მეტს და არც ნაკლებს. სამაგიეროდ, საპირისპიროდ „რაო“ ჩვენ ამ ფულს არ გვაძლევდა, ამაზე მიწერილი გვაქვს არაერთხელ, რომ გთხოვთ შეასრულოთ თქვენი ვალდებულებები კეთილსინდისიერად. „რაო“ ამაზე გვპასუხობდა, რომ მხოლოდ ეს ფული შეგროვდა და გვაძლევდა ცოტას.
ჩვენ ვამაყობთ იმით, რომ იმდენად კეთილსინდისიერად ვმუშაობდით, რომ არცერთ ორგანიზაციას ფულს არ ვუტეხავდით, ყველას იმდენს ვაძლევდით, რაც ეკუთვნოდა. მერე როგორც აღმოჩნდა სამწუხაროდ „რაო“ ამბობდა, რომ ქართველებისთვის აგროვებდა ფულს რასაც ჩვენ არ გვაძლევდა, მიუხედავად ჩვენი არაერთი წერილობითი მოთხოვნისა, როდესაც მან დააფუძნა „გერა“.
თქვენ ამბობთ, რომ „რაომ“ დააფუნა „გერამ“? დოკუმენტების მიხედვით ასეა?
დიახ, მათი ერთ-ერთი წევრი, ერთ-ერთ საჯარიო ინტერვიუში „იმედზე“ ამბობს, რომ მაგალითად „გერა“ „რაოს“შვილობილი კომპანიაა. ეს ინტერვიუ ინტერნეტში დევს. აჩი ფურცელაძე ამბობს, რომ „გერა“ არის „რაოს“ შვილობილი კომპანია. ამაზე ბევრი სხვა მტკიცებულებაც გვაქვს, ეს ადამიანი პირადად იყო ჩამოსული შემხვდა და მითხრა, ისე უნდა გააკეთოთ, როგორც ჩვენ გვინდა, თუ არა და შეიქმნება პრობლემები. უარი როცა მიიღო, მაშინ დაიწყო პრობლემების შექმნა. ეს არის ანდრეი ლიპეტცკი, რომელიც რუსეთში განაგებს შავ სქემას.
როგორია ეს შავი რუსული სქემა? რა იცით ამის შესახებ?
“რაო” ასეთ შვილობილ კომპსანიებს აფუძნებს, მაგალითად, ბელარუსში „მორა“ დააფუძნა, ასევე უკრაინაში, ყაზახეთში და საქართველოში. ამ კომპანიების საშუალებით თანხას იმას შვრება...
როდესაც დააფუძნეს „გერა“, 2019-2020 წელში, მხოლოდ წელიწადსა და 8 თვეში, ოფიციალური დოკუმენტებით, მიიღო სამი რუსული ორგანიზაციიდან, დაახლოებით მილიონი დოლარი. ეს არის იმდენად დიდი თანხა საქართველოს მასშტაბისთვის, რომ მაგალითად იგივე ამ სამმა ორგანიზაციამ, ამ პერიოდის განმავლობაში, საფრანგეთს გადაუხადა ორჯერ უფრო ნაკლები, ვიდრე გადაუხადა საქართველოს და იტალიას გადაუხადა სამჯერ თუ ოთხჯერ ნაკლები ვიდრე საქართველოს. რაც თეორიულად შეუძლებელია. მილიონი დოლარი არის ის თანხა, რომელიც წარმოუდგენელია, თეორიულად შეუძლებელია, რომ საქართველოს რეპერტუარზე რუსეთში შეგროვდეს მილიონი დოლარი ორ წელიწადში.
თქვენ ერთ-ერთ ინტერვიუში, ამბობთ რომ 5 მილიონ 100 ათასი შეაგროვეთ 2015 წელს საქართველოში, მეგონა ეს თანხები, ანუ მილიონები, არ იყო დიდი თანხები თქვენთვის...
ეს 5 მილიონი მთელი მსოფლიოს ფულია, მარტო ქართველების ხომ არაა. ამ 5 მილიონი ლარიდან დაახლოებით 40-35 % არის საქართველოს ავტორების, დანარჩენი არის მთელი მსოფლიოს ფული. იმიტომ, რომ საქართველოში არ შეიძლება ქართული რეპერტუარი უფრო მეტი იყოს, ვიდრე სხვა დანარჩენი. აქედან გამომდინარე ვამბობ, რომ არ შეიძლება რუსეთს საქართველოსთვის შეეგროვებინა იტალიასა და საფრანგეთზე ორჯერ მეტი, ეს არის ნონსენსი. ამიტომ ეს არის პირდაპირი დაფინანსება.
2019 წელს, როდესაც „გერა“ დააფუძნეს, ჩვენ რაო-დან გამოგვიგზავნეს წერილი, თქვენთან ხელშეკრულებას ვწყვეტთო, შემდგომში ეს მილიონი დოლარი გადაურიცხეს „გერას“. ეს არის ზუსტად პრობლემა, აფინანსებენ და ამ ფულით მერე მიმზიდველს ხდიან „გერას“ და სწორედ ამ ფულის გამო მოხდა რომ იმ 114 ადამიანის უმრავლესობა შევიდა შეცდომაში, გარდა 4-5 ადამიანისა, მოიხიბლა ამ შეთავაზებით. აქ თუ იღებდნენ ვთქვათ 100 ლარს, იქ შესთავაზეს 500 ლარი და ეს იყო მთელი ისტორია.
რაოსთან დაკავშირებით მაქვს მნიშვნელოვანი კითხვა.როდესაც „რაოსთან“ დაკავშირებით ვეძებდით ინფორმაციას აღმოჩნდა, რომ „რაოს“ ყოფილი დამფუძნებლების და თანამსრომელთა ერთი ჯგუფის მიმართ, რუსეთის პროკურატურაში აღიძრა საქმე. რამდენიმე ადამიანის დაკავებაც მოხდა, იქ იყო ერთი საინტერესო გვარი, რომელსაც კავშირი ჰქონდა საქართველოსთან.
ვინ იყო, არ ვიცით?
დიახ და მოვახერხეთ კიდეც ამ ადამიანის ჩაწერა. ის ამბობს, რომ ჯერ საჯაროდ არ სურს, მაგრამ თუ დამიძახებენ საქართველოში სამართალდამცავები, ჩამოვა და ისაუბრებს. ის ამბობს რომ „რაოს“ მხრიდან მას ჩამოჰქონდა თანხა საქართველოში ნაღდი ანგარიშწორებით, ანუ ქეშად.
შეიძლება „გერაში“ ჩამოჰქონდა...
„გერაში“ ვერ ჩამოიტანდა, რადგან რუსეთის პროკურატურაში საქმე აღიძრა რაოს მოღვაწეობაზე 2011-2015 წლებზე. ამბობს, რომ თქვენს ორგანიზაციასთანაც ჰქონდა კავშირი, ჩამოჰქონდა თანხა, რამდენჯერმე შეხვდა ადამიანებს, ერთი ორჯერ თქვენთანაც ჰქონდა შეხვედრა. გეცნობათ თქვენ ასეთი ამბავი?
არა, პირველად მესმის მსგავსი რამე. ვიცი რომ აღძრული იყო იქ საქმე, „რაოს“ წინააღმდეგ... დირექტორს მე პირადად არც ვიცნობდი, ახლაც არ ვიცნობ. საერთაშორისო კონფერენციებზე როდესაც ჩვენ ვხვდებით ერთმანეთს, ყოველთვის იყო ხოლმე მათი წარმომადგენელი. გარდა ამისა, მას შემდეგ, რაც „გერა“ დაფუძნდა, დავინტერესდი ამ ანდრეი კრიჩევსკის პიროვნებით, სპეციალური ვებგვერდია შექმნილი რუსეთში, სადაც მთლიანად წერია ამ ადამიანის მოქმედება, რატომ აკეთებს, რას აკეთებს.
ეს ადამიანი, რომელსაც მე ვესაუბრე, პირდაპირ ამბობს, რომ ჩამოჰქონდა ჩემოდნით თანხა , ორჯერ შევხვდი ბატონ გიგასო, აცხადებს...
სისულელეა!
ანუ ტყუილს ამბობს?
აბსოლუტური აბსურდია, გეუბნებით, არც კი ვიცნობდი, ვინ იყო „რაოს“ დირექტორი.
ის, ვისაც ეს თანხა ჩამოჰქონდა, დირექტორი არ ყოფილა, ის იყო „რაოს“ წარმომადგენელი, რომელსაც კონკრეტულად ეს საქმე ევალებოდა.
კონფერენციებზე ვინც დადიოდა „რაოს“ წარმომადგენელს, ვიცნობდი გამარჯობა გაგიმარჯოთი, ისევე როგორც ვიცნობდი, სომეხს, აზერბაიჯანელს და ბრიტანელს. ამიტომ ასეთი რამეები აბსურდია, გამორიცხულია იმიტომ, რომ არაფერში არ ჯდება, რისთვის ჩამოჰქონდა, ან რატომ უნდა ჩამოეტანა?
გასაგებია, მე ამ რესპოდენტის მიერ მოწოდებულ ინფორმაციას დავწერ და თქვენს პასუხსაც...
საოცრებაა ასეთი ბრალდება. თუმცა, რუსეთისგან არაფერია გასაკვირი, ყველაფერი შეუძლიათ დაგაბრალონ, მე მაგალითად ყალბი მოწმობა დამიბეჭდეს და დამაბრალეს, რომ დონბასის ბატალიონის წევრი ვარ. მსგავსი რაღაცეები ხდება. ღიმილის მომგვრელიცაა ეგეთი სისულელე.
ანუ, „რაოსგან“ ყოველთვის ირიცხებოდა თანხა, როგორც ამბობთ...
არა იმდენი, რამდენიც რეალურად უნდა ჩარიცხულიყო და როცა ვამბობ, ჩვენ უფრო მეტს ვრიცხავდით-თქო, ვგულისხმობ, რომ ზუსტად იმდენს, რამდენიც გროვდებოდა, ეს მერე აღმოჩნდა, რომ მეტი გამოდიოდა ვიდრე ის გვირიცხავდა. „რაოს“ კეთილსინდისიერად რომ ემუშავა, არ შეიძლებოდა ჩვენთან უფრო მეტი შეგროვებულიყო, ვიდრე იქ. რუსეთი დიდია და იქ მეტს აგროვებენ, ვიდრე ჩვენ, იქ უფრო ბევრი გადამხდელია. ამან დაგვაეჭვა და მივწერეთ წერილი აეხსნათ, რატომ იხდიდნენ ცოტას, მაგრამ რუსეთ- საქართველოს ურთიერთობა მოგეხსენებათ როგორიცაა. 4-ჯერ მაქვს მიწერილი.
ეს პროცესი თუ ასე გაგრძელდა, რაც თქვენ ორგანიზაციაში ხდება, გადინება წევრების, როგორ გესახებათ თქვენი მომავალი?
არა ეს არ მოხდება, სხვათა შორის, იმ 114 წევრიდან, რამდენიმე უკან დაბრუნდა.
ვინ, შეგიძლიათ მითხრათ?
არა, არ შემიძლია, თავად გააკეთებენ განცხადებას.
ახლა რამდენი წევრი გყავთ?
2 ათასზე ოდავ მეტი.
ფიქრობთ, რომ გადასვლები შეწყდა და აღარ გაგრძელდება?
ყოველ შემთხვევაში, მარტის თვეში იყო ძირითადი გადინებები.
