საქართველოს გენერალურ პროკურატურაში დღეს "ჩორჩანას საქმეზე" დაზვერვის სამსახურის ყოფილი უფროსი დავით სუჯაშვილი გამოიკითხა.
„ვისაუბრე როგორც უსაფრთხოების საბჭოს წევრმა. იყო ორი საბჭო, ეს არის უსაფრთხოების საბჭო, რომელიც პრეზიდენტს ექვემდებარებოდა და სახელმწიფო უსაფრთხოების და კრიზისების მართვის საბჭო. ეს ორი საბჭო, რომ გაუქმდა ჩატარდა რეფორმები და შეიქმნა ახალი, ეროვნული უსაფრთხოების საბჭო. ამან წაიღო თავის პერიოდი. ეს იყო პირველი შეხვედრა და ეს შეხვედრა ატარებდა ძირითადად ტექნიკურ, საორგანიზაციო ხასიათს. საბჭოს თითოეულ წევრს შეუძლია მიმართოს თავის კომპეტენციის ფარგლებში პრემიერს, რათა მან მოიწვიოს უსაფრთხოების საბჭო. საბჭომ უნდა განიხილოს მსგავსი საკითხები. შინაგან საქმეთა სამინისტროსგან და მინისტრისგან ამაზე ინფორმირებულები არ ვყოფილვართ. ღია წყაროებიდან გავიგე ეს ინფორმაცია. კარგი იქნებოდა, რომ მანამდე მცოდნოდა ეს ინფორმაცია. მოსახლეობა ჩავარდა საკმაოდ რთულ ვითარებაში, იქ დამატებითი საგუშაგოები გახსნა რუსეთის ფედერაციამ“, - განაცხადა დავით სუჯაშვილმა გამოკითხვის დასრულების შემდეგ,
ცნობისთვის, საქართველოს გენერალურმა პროკურატურამ, 2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შს ყოფილი მინისტრის, გიორგი გახარიას მიერ განხორციელებული ქმედების შესწავლა დაიწყო.
გამოკითხვაზე უკვე იმყოფებოდა, შინაგან საქმეთა ყოფილი მინისტრი ვახტანგ გომელაური. ასევე საქართველოს მე-11 მოწვევის პარლამენტის წევრი ალექსანდრე ტაბატაძე. რომელიც იმ პერიოდი სახელმწიფო უსაფრთხოების სამსახურის უფროსის მოადგილე იყო. ასევე პარლამენტის ყოფილი წევრი კახა კახიშვილი. ის 2019 წელს მთავრობის ადმინისტრაციის ხელმძღვანელი იყო.
ასევე, გამოკითხვაზე იყო საქართველოს რეგიონული განვითარებისა და ინფრასტრუქტურის ყოფილი მინისტრი მაია ცქიტიშვილი
ასევე, ფინანსთა ყოფილი მინისტრის ივანე მაჭავარიანი და თავდაცვის ყოფილი მინისტრი ლევან იზორია
შეგახსენებთ, 2025 წლის 14 ივნისს გენერალურმა პროკურატურამ გაავრცელა განცხადება. სადაც ნათქვამია:
"საქართველოს პროკურატურაში მიმდინარეობს გამოძიება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე, საქართველოს სისხლის სამართლის კოდექსის 318-ე მუხლის პირველი ნაწილით, 19, 318-ე მუხლის მეორე ნაწილით, 319-ე და 321პრიმა მუხლის მე-2 ნაწილის ,,ა“ ქვეპუნქტით.
მიმდინარე გამოძიების ფარგლებში სხვა საკითხებთან ერთად შესწავლის საგანს წარმოადგენს 2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ საქართველოს შინაგან საქმეთა ყოფილი მინისტრის, გიორგი გახარიას მიერ განხორციელებული ქმედება.
მიმდინარე გამოძიების ფარგლებში მოწმის სახით დაბარებულ იქნა ვახტანგ გომელაური, რომელიც 2019 წლის აგვისტოს მდგომარეობით იკავებდა საქართველოს სახელმწიფო უსაფრთხოების სამსახურის უფროსის პოზიციას.
საზოგადოებას შევახსენებთ, რომ ჩორჩანას საგუშაგოსთან დაკავშირებული საეჭვო გარემოებების შესწავლა ასევე მიმდინარეობს საქართველოს პარლამენტის დროებითი საგამოძიებო კომისიის ფორმატში, სადაც განმარტების მისაცემად იმყოფებოდა საქართველოს ყოფილი პრემიერ-მინისტრი გიორგი გახარია.
საქმეზე გრძელდება გამოძიება, რომლის მიმდინარეობის შესახებ საზოგადოებას პერიოდულად მივაწვდით ინფორმაციას." - ნათქვამია უწყების გავრცელებულ ინფორმაციაში.
