საქართველოში უკრაინის საელჩო უკრაინის საქმეთა დროებითი რწმუნებულის სტატიას აქვეყნებს. დმიტრო ბერეჟნოის სტატიაში წერია, რომ საქართველო იყო ერთ-ერთი პირველი ქვეყანა, რომელმაც კარი გაუღო ათასობით უკრაინულ ოჯახს, საქართველოში უკრაინისთვის ჰუმანიტარული და სოციალური მხარდაჭერა ნამდვილად საერთო ეროვნული გახდა.
აქვე ხაზგასმულია, რომ საქართველოს მთავრობისა და ადგილობრივი მუნიციპალიტეტების მხარდაჭერით, უკრაინელი ბავშვები სოციალურად დაუცველი ოჯახებიდან, განსაკუთრებით კი ის ბავშვები, რომელთა მშობლებმა სიცოცხლე შესწირეს უკრაინის სუვერენიტეტისა და ტერიტორიული მთლიანობის დაცვას, რეგულარულად ჩამოდიან საქართველოში დასვენებისა და ფსიქოლოგიური რეაბილიტაციისთვის.
„2022 წლის თებერვლის ბოლოდან უკრაინის 500 ათასზე მეტმა მოქალაქემ იძულებითი ევაკუაცია მოახდინა და საქართველოს ტერიტორიის ტრანზიტით მსოფლიოს სხვადასხვა კუთხეში გაემგზავრა. ბევრი მათგანისთვის სწორედ ქართული მიწა გახდა პირველი უსაფრთხო თავშესაფარი რუსეთის მიერ გაჩაღებული ფართომასშტაბიანი ომის დასაწყისის საშინელებების შემდეგ. ამჟამად 27 ათასზე მეტი უკრაინელი აგრძელებს საქართველოში დროებით ცხოვრებას, სამართლიანი მშვიდობის დადგომასა და მშობლიურ სახლში დაბრუნების შესაძლებლობას ელოდება. უკრაინის ჰუმანიტარულმა და სოციალურმა მხარდაჭერამ საქართველოში ჭეშმარიტად საყოველთაო-სახალხო მასშტაბი შეიძინა, რამაც გააერთიანა სახელმწიფო და ადგილობრივი ხელისუფლების ორგანოების, ბიზნესის, სამოქალაქო საზოგადოების, საქართველოს მართლმადიდებელი ეკლესიისა და რიგითი მოქალაქეების ძალისხმევა. ომის პირველ, ყველაზე მძიმე თვეებში, ათასობით უკრაინულმა ოჯახმა, რომლებიც იძულებულნი იყვნენ თავშესაფარი საქართველოში ეძებნათ, მიიღო უფასო საცხოვრებელი, ცხელი საკვები, მატერიალური დახმარება და, რაც არანაკლებ მნიშვნელოვანია, ადამიანური სითბო და მხარდაჭერა.
საქართველოს მთავრობისა და ადგილობრივი მუნიციპალიტეტების მხარდაჭერით, სოციალურად შეჭირვებული ოჯახების უკრაინელი ბავშვები, მათ შორის ის ბავშვები, რომელთა მშობლებმაც სიცოცხლე უკრაინის სუვერენიტეტისა და ტერიტორიული მთლიანობის დაცვას შესწირეს, რეგულარულად ჩამოდიან საქართველოში დასასვენებლად და ფსიქოლოგიური რეაბილიტაციისთვის.
მნიშვნელოვანი წვლილი შეიტანა ინსტიტუციურმა მხარდაჭერამაც, რაც გამოიხატა საზღვრის კვეთის პროცედურების მაქსიმალურ გამარტივებაში, უკრაინის მოქალაქეებისთვის უვიზო ყოფნის ვადების გაზრდასა და მათთვის აუცილებელ სამედიცინო და სოციალურ მომსახურებებზე ხელმისაწვდომობის უზრუნველყოფაში. ამავდროულად, საქართველოს მოსახლეობის მიერ შეგროვებული და უკრაინაში გაგზავნილი ათასობით ტონა ჰუმანიტარული დახმარება, გენერატორები, სამედიცინო აღჭურვილობა და მედიკამენტები უაღრესად მნიშვნელოვან მხარდაჭერად იქცა ჩვენი ქალაქებისთვის ომის ყველაზე რთულ პერიოდში.
ამ თბილი და ღია მიღების წყალობით, საქართველოში მყოფი უკრაინელები თავს „უცხოეთში“ არ გრძნობენ. ბევრი ჩვენი თანამემამულისთვის საქართველო გახდა ჭეშმარიტად ახლობელი ქვეყანა, სადაც ისინი გრძნობენ ძმურ სითბოს, მხარდაჭერასა და გულწრფელ ადამიანურ სოლიდარობას", - წერს უკრაინის საქმეთა დროებითი რწმუნებული.
