განათლებისა და მეცნიერების კომიტეტის თავმჯდომარე გივი მიქანაძემ და კომიტეტის წევრმა ვლადიმერ კახაძემ შეხვედრა გამართეს საქართველოს ლაბორატორიული ცხოველების მეცნიერებათა ასოციაცია „გალას“-ს წევრებთან.
შეხვედრაზე ქართველი და ევროპელი მეცნიერების პარტნიორობისა და საერთო პროექტების განხორციელების შესაძლებლობები განიხილეს.
გივი მიქანაძემ ასოციაციის წევრებს განათლებისა და მეცნიერების კომიტეტის საქმიანობის შესახებ ინფორმაცია მიაწოდა. თავის მხრივ, ასოციაციის წევრებმა კანონმდებლებს დარგში არსებული გამოწვევები გააცნეს.
შეხვედრას ასევე ესწრებოდნენ ლაბორატორიული ცხოველების მეცნიერებათა საერთაშორისო საბჭოს (ICLAS) და ევროპის ლაბორატორიული ცხოველების მეცნიერებათა ასოციაციების ფედერაციის (FELASA) პირველი პირები: პროფესორი კლას აბელსონი, FELASA-ს პრეზიდენტი, პროფესორი ჰანა-მარჟა ვოიპიო, ICLAS-ის ევროპის რეგიონული კომიტეტის თავმჯდომარე და ამავე კომიტეტის წევრი, ოქსფორდის უნივერსიტეტის პროფესორი მანუელ ბერდოუ.
