ევროკომისიის პრეზიდენტის ურსულა ფონ დერ ლაიენის განცხადებით, აშშ-ის პრეზიდენტ დონალდ ტრამპის მიერ დაწესებული ტარიფები მსოფლიო ეკონომიკას სერიოზულ დარტყმას მიაყენებს.
"პრეზიდენტ ტრამპის მიერ გამოცხადებული უნივერსალური ტარიფები მსოფლიო ეკონომიკაზე სერიოზულ დარტყმას წარმოადგენს. ვწუხვარ, რომ ასეთი არჩევანი გაკეთდა. გულწრფელად შევაფასოთ მასშტაბური შედეგები. მსოფლიო ეკონომიკა დიდ ზარალს მიიღებს". – წერია ევროკომისიის პრეზიდენტის განცხადებაში.
მისი თქმით, "შედეგები მილიონობით ადამიანის ცხოვრებაზე აისახება, მსოფლიოს გარშემო მომხმარებლები დაზარალდებიან". ევროკომისარი ეთანხმება ტრამპს იმაში, რომ სხვა სახელმწიფოები არასამართლიანად იყენებდნენ აშშ-ს გლობალურ ვაჭრობაში და მზად არის მხარი დაუჭიროს რეფორმებს, მაგრამ ხაზი გაუსვა იმას, რომ ტარიფების მიღება პრობლემას არ გადაჭრის.
"სწორედ ამიტომ, თავიდანვე ყოველთვის მზად ვიყავით აშშ-სთან მოლაპარაკებებისთვის, ამავდროულად პასუხის გასაცემად მზად ვართ. ვასრულებთ მუშაობას საპასუხო ზომების პირველ პაკეტზე".
ფონ დერ ლაიენმა ხაზი გაუსვა, რომ "ევროპელები მუდამ დაიცავენ საკუთარ ინტერესებსა და ფასეულობებს".
ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში კაია კალასი ასევე აცხადებს, რომ სავაჭრო ომებში გამარჯვებულები არ არიან და საბოლოოდ ყველაფრის გადახდა ჩვეულებრივ მომხმარებელს მოუწევს.
"ნათელია, რომ ყველა ეს ტარიფი მომხმარებლისთვის ფასებს აძვირებს და, საბოლოო ჯამში, ყველაფერს ჩვენ ვიხდით", - აღნიშნა კალასმა ევროკავშირის თავდაცვის მინისტრების არაფორმალური შეხვედრის დაწყებამდე.
მან ხაზი გაუსვა, რომ ევროკავშირის ქვეყნებს ძალზე მნიშვნელოვანი თანამშრომლობა აქვთ აშშ-სთან თავდაცვის სფეროში, ამავდროულად, ევროკავშირი იმუშავებს საკუთარი თავდაცვის ინდუსტრიის გასაძლიერებლად:
"ჩვენ ასევე ვფიქრობთ იმაზე, თუ რა შეგვიძლია გავაკეთოთ ჩვენს საკუთარ თავდაცვის ინდუსტრიასთან დაკავშირებით, რადგან ჩვენ ახლა ბევრს ვყიდულობთ ამერიკელებისგან, მაგრამ უნდა გავამრავალფეროვნოთ ჩვენი პორტფელი, რათა გვქონდეს აქ წარმოების შესაძლებლობები - საბრძოლო მასალა და ნივთები, რაც აქ გვჭირდება - და ასევე შეგვეძლოს სხვა მოკავშირეებისგან ყიდვა, რათა გვქონდეს დივერსიფიცირებული პორტფელი ამ მხრივ".
ცნობისთვის, აშშ-ს პრეზიდენტმა დონალდ ტრამპმა, სულ მცირე, 10%-იანი საბაზისო ტარიფი ყველა ქვეყანას დაუწესა, ევროკავშირს - 20%-იანი.
