უკრაინის პრეზიდენტმა, ვოლოდიმირ ზელენსკიმ და კანადის პრემიერ-მინისტრმა, მარკ კარნიმ ქალაქ კალგარიში გამართულ შეხვედრაზე სტრატეგიული და პოლიტიკური თანამშრომლობის ახალ, გრძელვადიან დოკუმენტს მოაწერეს ხელი. "ასწლიანი პარტნიორობის" დეკლარაცია მიზნად ისახავს ორ ქვეყანას შორის ურთიერთობების ყოვლისმომცველ სტრატეგიულ დონემდე ამაღლებას.
ხელშეკრულების მთავარ ბირთვს თავდაცვასთან დაკავშირებული ინოვაციები წარმოადგენს. კანადა და უკრაინა აყალიბებენ გრძელვადიან სამხედრო-ინდუსტრიულ პარტნიორობას მილიონობით უპილოტო საფრენი აპარატის (დრონის), ანტიდრონული სისტემებისა და საბრძოლო მასალების ერთობლივი წარმოებისთვის.
კანადის პრემიერ-მინისტრმა დაადასტურა მზაობა, უზრუნველყოს უკრაინის უმწვავესი სამხედრო საჭიროებები, განსაკუთრებული ყურადღება დაეთმობა საჰაერო თავდაცვის სისტემებს. გარდა ამისა, ოტავამ ოფიციალურად გააგრძელა სამხედრო წვრთნების მისია Operation UNIFIER 2029 წლამდე.
მხარეები შეთანხმდნენ თავისუფალი ვაჭრობის განახლებული შეთანხმების ფარგლებში ეკონომიკური და საინვესტიციო კავშირების გაფართოებაზე, საჯარო-კერძო პარტნიორობის წახალისებასა და უკრაინის აღდგენის პროცესის მხარდაჭერაზე.
ხელშეკრულება მოიცავს თანამშრომლობის გაღრმავებას კრიტიკული მინერალების, ენერგოუსაფრთხოების, ხელოვნური ინტელექტის, კიბერუსაფრთხოებისა და ციფრული მმართველობის სფეროებში.
ვოლოდიმირ ზელენსკიმ კანადის მხარდაჭერას "ისტორიული და პრაქტიკული შედეგების მომტანი" უწოდა, ხოლო მარკ კარნიმ განაცხადა, რომ კანადის ერთგულება უკრაინის თავისუფლებისა და სუვერენიტეტის მიმართ ურყევია.
