შვედეთში ქვეყნის უმაღლესი საკანონმდებლო ორგანოს — რიქსტაგის (Riksdag) არჩევნები იმართება. მიმდინარე კენჭისყრამ შესაძლოა, ისტორიული გარდატეხა მოახდინოს ქვეყნის პოლიტიკურ ლანდშაფტში, რადგან არსებული პროგნოზებით, ულტრამემარჯვენე ძალები პირველ ისტორიულ შანსს ფლობენ, რომ სამთავრობო კაბინეტებში მინისტრთა პორტფელები მიიღონ.
პოლიტიკური ბრძოლა თანაბარი ძალების პირობებში მიმდინარეობს მოქმედ მემარჯვენე-ცენტრისტული კოალიციასა (რომელსაც პრემიერ-მინისტრი ულფ კრისტერსონი ხელმძღვანელობს) და ცენტრისტულ-მემარცხენე ოპოზიციურ ბანაკს შორის, რომელსაც სოციალ-დემოკრატების ლიდერი, მაგდალენა ანდერსონი უძღვება.
არჩევნების მთავარ ცენტრს ნაციონალისტური პარტია "შვედი დემოკრატები" (Sweden Democrats) წარმოადგენს. მიუხედავად იმისა, რომ წარსულში ამ პოლიტიკურ ძალას ტრადიციული პარტიები მკაცრად ემიჯნებოდნენ და იზოლაციაში აქცევდნენ მათი ანტიიმიგრაციული პლატფორმისა და წარსული კავშირების გამო, ბოლო წლებში სურათი შეიცვალა.
მოქმედმა პრემიერ-მინისტრმა ულფ კრისტერსონმა განაცხადა, რომ გამარჯვების შემთხვევაში მზადაა, მემარჯვენე ნაციონალისტები პირდაპირ მთავრობაში შეიყვანოს და მათ მნიშვნელოვანი სამინისტროები ჩააბაროს.
თავის მხრივ, ოპოზიციური სოციალ-დემოკრატები ამომრჩევლებს აფრთხილებენ, რომ ულტრამემარჯვენეების ხელისუფლებაში მოსვლა ქვეყნის იდენტობას რადიკალურად შეცვლის. ოპოზიციის ლიდერი მაგდალენა ანდერსონი აქტიურად აპროტესტებს კრისტერსონის ამ სტრატეგიას და მოსახლეობას სოციალური სახელმწიფოს დაცვისა და ეკონომიკური სტაბილურობის აღდგენისკენ მოუწოდებს.
