"ეს არა მხოლოდ ისრაელის, არამედ ცივილიზებული, თავისუფალი სამყაროსა და თანამედროვე არაბული ქვეყნების ბრძოლაც არის", – ამის შესახებ ისრაელის პრემიერ-მინისტრმა ბენიამინ ნეთანიაჰუმ ბრიტანეთის პრემიერ რიში სუნაკთან ერთად გამართულ ბრიფინგზე განაცხადა.
ბენიამინ ნეთანიაჰუმ რიში სუნაკს მხარდაჭერისთვის მადლობა გადაუხადა.
„ჩვენ ვიბრძვით ბოროტების ღერძის წინააღმდეგ. ეს არ არის მხოლოდ ისრაელის ბრძოლა, არამედ ეს არის ცივილიზებული და თავისუფალი სამყაროსა და თანამედროვე არაბული ქვეყნების ბრძოლაც. მეორე მხარეს არის ბოროტების ღერძი, რომელშიც შედის „ჰამასი“, „ჰეზბოლა“ და ირანი“, - განაცხადა ნეთანიაჰუმ.
რიში სუნაკმა კიდევ ერთხელ აღნიშნა, რომ ბრიტანეთი ისრაელის გვერდით დგას.
„მე ვამაყობ, რომ აქ თქვენთან ერთად ისრაელისთვის ყველაზე მძიმე დროს ვდგავარ. ჩვენ გვინდა, რომ თქვენ გაიმარჯვოთ“, - განუცხადა სუნაკმა ნეთანიაჰუს.
ამასთან, მან აღნიშნა, რომ ღაზას სექტორის მოსახლეობისთვის ჰუმანიტარული ტვირთის მიწოდება მნიშვნელოვანია.
