ცივი ომის შემდეგ აშშ-ის ჰეგემონიით განსაზღვრული „უნიპოლარული მომენტი“ თუ არსებობდა, ის დიდი ხანია, დასრულდა და ამის ნაცვლად, მსოფლიო „გავლენის სფეროებს“ შორის კონკურენციის წინაშე დგას, სადაც დიდი ძალები „ნულოვანი ჯამის თამაშში“ არიან, – ამის შესახებ გერმანიის კანცლერმა, ფრიდრიხ მერცმა, მიუნხენის უსაფრთხოების კონფერენციაზე განაცხადა.
„რუსეთის მიერ უკრაინაში შეჭრის დაწყებით, ჩვენ შევედით მსოფლიოს ახალ ფაზაში, რომელიც გვაიძულებს, სუნთქვა შევიკავოთ და შევცვალოთ ჩვენი სამყარო უფრო ყოვლისმომცველი გზით, ვიდრე მრავალი წლის წინ გვეგონა. ჩვენ უნდა ვისაუბროთ, ეს უფრო აქტუალურია, ვიდრე ოდესმე. ეს წესრიგი არასრულყოფილია, წესრიგი, რომელიც თავის აყვავების ხანაში იყო, აღარ არსებობს. ევროპა ახლახან დაბრუნდა მსოფლიო ისტორიის შვებულებიდან. ერთად შევედით ეპოქაში, რომელიც კვლავ ძალაუფლებითა და ძალაუფლების პოლიტიკით ხასიათდება. პირველ რიგში ჩვენ ვხედავთ რუსეთის რევიზიონიზმს, მის სასტიკ ომს უკრაინის წინააღმდეგ, ჩვენი პოლიტიკური წესრიგის წინააღმდეგ. სხვა მოვლენებიც ხდება. ჩინეთს სურს, იყოს ლიდერი მსოფლიოს ფორმირებაში და მან ამისთვის გზა სტრატეგიული მოთმინებით გაკვალა. მომავალში პეკინი შეიძლება, სამხედრო თვალსაზრისით აშშ-თან თანაბარ პირობებში იყოს. ჩინეთი სისტემატურად იყენებს სხვების დამოკიდებულებას და სამყაროს თავის სასარგებლოდ ხელახლა განსაზღვრავს. შეერთებული შტატების ლიდერობა კითხვის ნიშნის ქვეშ დადგა და შესაძლოა, დაიკარგა კიდეც“, – აღნიშნა ფრიდრიხ მერცმა.
როგორც გერმანიის კანცლერმა აღნიშნა, დიდი სახელმწიფოების პოლიტიკა სწრაფი, მკაცრი და ხშირად არაპროგნოზირებადია, სადაც ბუნებრივი რესურსები, ტექნოლოგიები და მიწოდების ჯაჭვები ნულოვანი ჯამის თამაშში მოლაპარაკების ინსტრუმენტებად არის დაყვანილი.
მერცის თქმით, აშშ უკვე „სწრაფი ტემპით და რადიკალური“ გზით ეგუება ამ ცვალებად მსოფლიო წესრიგს, რაც მხოლოდ ამ ცვლილებების „აჩქარებას“ ემსახურება.
მერცმა აღნიშნა, რომ წარსულში ევროპის პოლიტიკას „პრობლემის გადაჭრის საშუალებები აკლდა“. მისივე თქმით, ევროპა „ახლა ამ ხარვეზს ავსებს“ და ამბობს, რომ ევროპა უკეთ იქნება მომზადებული მომავალი გამოწვევების წინაშე.
გერმანიის კანცლერის განცხადებით, დაიწყო მოლაპარაკებები საფრანგეთის პრეზიდენტთან, ემანუელ მაკრონთან ევროპული ბირთვული შეკავების შესახებ, რომელიც სრულად იქნება ინტეგრირებული ნატო-ს ფარგლებში ბირთვულ გაზიარებაში და არ იქნება სხვადასხვა უსაფრთხოების დონის ზონები ევროპაში.
„ჩვენ ევროპის გულში ვართ. ევროპა თუ დაიშლება, გერმანიაც დაიშლება“, – აღნიშნა მერცმა.
გერმანიის კანცლერის თქმით, ევროპას სურს, განამტკიცოს ტრანსატლანტიკური პარტნიორობა.
მისივე განცხადებით, აშშ-ის ვიცე-პრეზიდენტი ჯეი დი ვენსი მართალი იყო, როდესაც ევროპას და აშშ-ს შორის განსხვავებებზე საუბრობდა.
„აშშ-ში MAGA-ს კულტურის ბრძოლა ჩვენი არ არის. სიტყვის თავისუფლება სრულდება იქ, სადაც ნათქვამი სიტყვები მიმართულია ადამიანის ღირსების წინააღმდეგ და ჩვენი მთავარი კანონის წინააღმდეგ. ჩვენ არ გვჯერა ტარიფების და პროტექციონიზმის, ჩვენ გვჯერა თავისუფალი ვაჭრობის. ჩვენ ერთგული ვართ კლიმატური შეთანხმების, რადგან ჩვენ დარწმუნებული ვართ, რომ გლობალური გამოწვევების გადაწყვეტა შესაძლებელია ერთად. ტრანსატლანტიკური პარტნიორობა აღარ არის ის, რაც შეგვიძლია, თავისთავად მივიღოთ. ჩვენ პარტნიორობას თუ აქვს მომავალი, ჩვენ ის ახლებურად უნდა განვამტკიცოთ. ატლანტიკის ორივე მხარეს უნდა გავაცნობიეროთ, რომ ერთად უფრო ძლიერები ვართ. ჩვენ ევროპელებმა ვიცით, რამდენად ძვირფასია ის ნდობა, რომელსაც ნატო დაეფუძნა. სუპერძალების დროშიც კი, აშშ ენდობა ამ ნდობას. აშშ-ც კი მიაღწევს თავისი ძალის ლიმიტებს, თუ მარტო იქნება. პენტაგონის სტრატეგოსებმა ეს იციან. ნატო მხოლოდ ჩვენი არ არის, ასევე არის თქვენი კონკურენციული უპირატესობა. სამი თაობის განმავლობაში, მოკავშირეებს შორის ნდობამ, პარნიორებმა და მეგობრებმა ნატო აქციეს ყველა დროის უძლიერეს ალიანსად. ევროპას სიღმისეულად იცის, რამდენად ძვირფასია ეს. დიდი ძალების მეტოქეობის დროში, აშშ-ც კი არ იქნება საკმარისად ძლიერი, თუ მარტო იქნება. მოდით, აღვადგინოთ და ავაღორძინოთ ტრანსატლანტიკური ნდობა ერთად. ჩვენ, ევროპელები ჩვენს წილს ვაკეთებთ“, – განაცხადა ფრიდრიხ მერცმა.
თარგმანი: პირველი არხი
