ალჟირის პარლამენტმა ერთხმად მიიღო კანონი, რომელიც ქვეყნის ფრანგული~ კოლონიზაციას დანაშაულად აცხადებს და პარიზისგან ბოდიშის მოხდასა და რეპარაციებს ითხოვს. ნაბიჯი, რომელიც ორ ქვეყანას შორის დიპლომატიური კრიზისის ფონზე იქნა მიღებული, დიდწილად სიმბოლურია, მაგრამ პოლიტიკურად უაღრესად მნიშვნელოვანია, - იუწყება „გარდიანი“.
დღეს, პარლამენტის წევრები, რომლებსაც ეროვნული დროშის ფერებში შარფები ეკეთათ, მქუხარე აპლოდისმენტებითა და „გაუმარჯოს ალჟირს!“ შეძახილებით შეხვდნენ კანონის მიღებას. ტექსტში ნათქვამია, რომ საფრანგეთი „იურიდიულად პასუხისმგებელია ალჟირში თავისი კოლონიური წარსულისა და მის მიერ გამოწვეული ტრაგედიებისთვის“.
პარლამენტის სპიკერ იბრაჰიმ ბუგალის თქმით, კენჭისყრა „ნათელ სიგნალს აგზავნის, როგორც ქვეყნის შიგნით, ასევე საერთაშორისო დონეზე, რომ ალჟირის ეროვნული მეხსიერების წაშლა ან განხილვა შეუძლებელია“.
კანონში დეტალურად არის აღწერილი „ფრანგული კოლონიზაციის დანაშაულები“, მათ შორის ბირთვული ტესტირება, სასამართლოს გარეშე სიკვდილით დასჯა, „ფიზიკური და ფსიქოლოგიური წამება“ და „რესურსების სისტემატური ძარცვა“. მასში ხაზგასმულია, რომ „ფრანგული კოლონიზაციით მიყენებული ყველა მატერიალური და მორალური ზიანის სრული და სამართლიანი კომპენსაცია ალჟირის სახელმწიფოსა და ხალხის განუყოფელი უფლებაა“.
ალჟირში საფრანგეთის მმართველობა, რომელიც 1830 წლიდან 1962 წლამდე გაგრძელდა, აღინიშნა მასობრივი მასობრივი დეპორტაციებით, რამაც კულმინაციას მიაღწია დამოუკიდებლობისთვის სისხლიან ომში, რომელიც 1954-1962 წლებში მიმდინარეობდა. ალჟირის მონაცემებით, ომში 1,5 მილიონი ადამიანი დაიღუპა, ხოლო ფრანგი ისტორიკოსების თქმით, მსხვერპლთა საერთო რაოდენობა დაახლოებით 500 000, მათ შორის ალჟირელი კი 400 000 იყო.
საფრანგეთის პრეზიდენტმა ემანუელ მაკრონმა ადრე ალჟირის კოლონიზაციას „კაცობრიობის წინააღმდეგ დანაშაული“ უწოდა, მაგრამ ოფიციალური ბოდიშის მოხდისგან თავი შეიკავა.
