საქართველოს გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრთან თანამშრომლობით, გაეროს სურსათისა და სოფლის მეურნეობის ორგანიზაციამ (FAO) ქვეყნის მასშტაბით იდეების კონკურსი „კლიმატგონივრული სოფლის მეურნეობა” ჩაატარა.
კონკურსის მიზანია მწვანე სოფლის მეურნეობის სექტორში ახალგაზრდების ჩართულობა, საქართველოში კლიმატისადმი მდგრადი სოფლის მეურნეობისთვის ინოვაციური გადაწყვეტილებების გენერირება და მდგრადი პრაქტიკის შესახებ ცნობიერების ამაღლება.
მიღებული 18 იდეიდან, ოთხი საუკეთესო იდეის ავტორი ღონისძიების სპონსორებმა და პარტნიორებმა დააჯილდოვეს. მონაწილეებმა, როგორც ინდივიდუალურად, ასევე გუნდურად, წარმოადგინეს იდეები, რომლებიც ხელს უწყობს საქართველოს სოფლის მეურნეობის ტრანსფორმაციას უფრო დაბალემისიან სექტორად.
იდების კონკურსი - „იდეათონი“ მწვანე კლიმატის ფონდის (GCF) მიერ დაფინანსებული პროექტის „სტრატეგიული მზაობა საქართველოს განახლებული ეროვნულ დონეზე განსაზღვრული წვლილის განსახორციელებლად და კლიმატის მდგრადობის მისაღწევად” ფარგლებში გაიმართა.
