თბილისში ადგილობრივი ეკონომიკური განვითარების მე-14 ფორუმი სახელწოდებით - „ჯანსაღი ქალაქი - მწვანე, ეკოლოგიურად სუფთა გარემო, მოქნილი და მდგრადი ურბანული განვითარება“ მიმდინარეობს. ფორუმის მუშაობაში საკრებულოს წევრმა ვლადიმერ ბოჟაძემ მიიღო მონაწილეობა.
საკრებულოს წევრმა ფორუმზე ისაუბრა თემაზე „ჯანსაღი ცხოვრების წესის გავლენა ქალაქის ეკონომიკაზე“. მისი თქმით, სპორტის ინდუსტრია მთელ მსოფლიოში და მათ შორის საქართველოში ეკონომიკის მზარდი დარგია.
„სპორტის ინდუსტრიას მნიშვნელოვანი საბაზრო წილი უჭირავს მსოფლიოში და ეკონომიკური სექტორის მნიშვნელოვანი სეგმენტია, რაც გავლენას ახდენს ეკონომიკის ზრდაზე. განვითარებული ქვეყნების მსგავსად, ჩვენი ქვეყანაც დიდ ყურადღებას აქცევს სპორტის განვითარებას. სპორტის ინდუსტრიას მხარდაჭერა აქვს როგორც სახელმწიფოს მხრიდან, ასევე კერძო სექტორიდან. ჩვენი სახელმწიფო ცდილობს ბევრი მასშტაბური სპორტული ღონისძიების მასპინძელი სწორედ საქართველო იყოს. მსგავსი ღონისძიებები სხვა სარგებელთან ერთად დამატებითი სამუშაო ადგილების გაჩენის შესაძლებლობას იძლევა, რაც უმნიშვნელოვანესი ფაქტორია“, - განაცხადა ვლადიმერ ბოჟაძემ.
როგორც ვლადიმერ ბოჟაძემ აღნიშნა, სპორტული ინდუსტრიის ხელშეწყობისთვის დედაქალაქის მთავრობა მნიშვნელოვან პროექტებს ახორციელებს.
ადგილობრივი ეკონომიკური განვითარების ფორუმი 2007 წლიდან ჩამოყალიბდა მოწინავე იდეების გაცვლისა და ქმედითი გადაწყვეტილებების მიღების პლატფორმად, რომლის ფარგლებშიც ქალაქი ყოველწლიურად მასპინძლობს როგორც ადგილობრივ, ასევე საერთაშორისო დონის სპიკერებს, სხვადასხვა დარგის ექსპერტებს, მუნიციპალიტეტებისა და აკადემიური წრეების წარმომადგენლებს.
