მოხარული ვარ, რომ მონაწილეობას ვიღებ ევროკავშირის წევრი და პარტნიორი ქვეყნების პარლამენტების თავმჯდომარეების კონფერენციაში და მაქვს შესაძლებლობა, გაგიზიაროთ საქართველოს ხედვა, – ამის შესახებ საქართველოს პარლამენტის თავმჯდომარე შალვა პაპუაშვილმა პრაღაში, ევროკავშირის პარლამენტების სპიკერების ყოველწლიურ კონფერენციაზე განაცხადა.
„უკვე ერთ წელზე მეტია, უფრო და უფრო მეტად დაუცველ მსოფლიოში ვცხოვრობთ. რუსეთის მიერ უკრაინის სასტიკმა და უკანონო დაპყრობამ უსაფრთხოების მასშტაბური გამოწვევის წინაშე დაგვაყენა. უკრაინისადმი სოლიდარობისთვის ჩვენი ერთიანი პოზიცია უკიდურესად მნიშვნელოვანია უკრაინაში სამართლიანი მშვიდობის დასამყარებლად. ამ ომმა, კიდევ ერთხელ წარმოაჩინა საპარლამენტო დიპლომატიის მნიშვნელობა ქვეყნებს შორის თანამშრომლობის გაღრმავებისა და საერთო გამოწვევებთან გამკლავების პროცესებში. მოხარული ვარ, რომ ჩემი კოლეგა და მეგობარი, ბატონი რუსლან სტეფანჩუკი მონაწილეობას იღებს ამ მნიშვნელოვან ღონისძიებაში. მსურს, კიდევ ერთხელ დავადასტურო საქართველოს ურყევი და შეუქცევადი მხარდაჭერა უკრაინის სუვერენიტეტისა და ტერიტორიული მთლიანობისადმი.
ჩვენ გვესმის უკრაინის ტკივილის. საქართველომ გამოცადა რუსეთის აგრესია 1990-იანი წლების დასაწყისსა და 2008 წელს. ამ განგრძობითმა აგრესიამ შედეგად მოიტანა საქართველოს ორი რეგიონის ოკუპაცია და საკუთარი სახლებიდან ასიათასობით ადამიანის იძულებითი და უკანონო გაძევება. სამწუხაროდ, მაშინ ჩვენი მიმართვებისა და გაფრთხილებების მიუხედავად, ვერ ვიხილეთ დასავლეთის შესაბამისი რეაგირება. საბედნიეროდ, დღესდღეობით ჩვენ ვხედავთ ძლიერ, ერთიან და ეფექტიან ევროპულ პასუხს რუსეთის აგრესიულ ქმედებებზე. საქართველომ უკრაინისადმი სოლიდარობა გამოხატა არა მხოლოდ სიტყვიერად, არამედ ძლიერი პოლიტიკური და დიპლომატიური ნაბიჯებით. ჩვენ ამას დღემდე ვაკეთებთ საქართველოს ტერიტორიების ოკუპაციისა და თბილისიდან რამდენიმე კილომეტრში რუსეთის უკანონო სამხედრო დანაყოფების არსებობის მიუხედავად. საქართველო შესაძლო სამხედრო ესკალაციის მაღალი რისკის წინაშე დგას. ამავე დროს, აღსანიშნავია, რომ საქართველო არ არის დაცული ნატო-ს უსაფრთხოების ქოლგით და არ სარგებლობს ევროკავშირის ეკონომიკური სოლიდარობით, თუმცა, უკრაინის მხარდასაჭერად საქართველო აქტიურად იყენებს თავის ერთ ხმას საერთაშორისო არენაზე“, – განაცხადა შალვა პაპუაშვილმა.
