რუსეთის გენერალური პროკურატურის ოფიციალურ ვებგვერდზე გამოქვეყნებული ინფორმაციით, "ლელო - "ძლიერი საქართველოს" წარმომადგენელს, ალეკო ელისაშვილს, დაუსწრებლად აღკვეთის ღონისძიების სახედ პატიმრობა შეეფარდა და მასზე ძებნა გამოცხადდა.
"დონეცკის სახალხო რესპუბლიკის პროკურატურამ დაამტკიცა ბრალდება 47 წლის საქართველოს მოქალაქის, ალეკო ელისაშვილის წინააღმდეგ სისხლის სამართლის საქმეზე. მას ბრალი დაუსწრებლად წაუყენეს რუსეთის ფედერაციის სისხლის სამართლის კოდექსის 359-ე მუხლის მე-3 ნაწილით (დაქირავებული მებრძოლის მონაწილეობა შეიარაღებულ კონფლიქტში).
გამოძიების თანახმად, 2022 წლის მარტში ელისაშვილი უკრაინაში პოლონეთთან სასაზღვრო გამშვები პუნქტის გავლით ჩავიდა, სადაც დაქირავებული მებრძოლის რანგში შეუერთდა საქართველოს ეროვნული ლეგიონის რიგებს, როგორც კიევის ოლქის ტერიტორიული თავდაცვის 25-ე ბატალიონის ნაწილი. სასწავლო ბაზების ტერიტორიაზე მან გაიარა სამხედრო წვრთნები, რომლებიც მიზნად ისახავდა საბრძოლო იარაღის გამოყენების უნარების შეძენას, შეიარაღებულ კონფლიქტში მონაწილეობისთვის საჭირო სტრატეგიის, ტაქტიკისა და მოქმედების მეთოდების შესწავლას, მიეწოდა პირადი ცეცხლსასროლი იარაღი, საბრძოლო მასალა, ფორმები და სპეციალური აღჭურვილობა. ამის შემდეგ ელისაშვილი მონაწილეობდა უკრაინის ტერიტორიაზე რუსეთის ფედერაციის შეიარაღებული ძალების სამხედრო მოსამსახურეების წინააღმდეგ სამხედრო ოპერაციებში, მათ შორის კიევის ოლქის ირპენის ქალაქისთვის ბრძოლებში. 2022 წლის აპრილში მან დატოვა უკრაინის ტერიტორია და დაბრუნდა საქართველოში.
ამ ქმედებებისთვის დაქირავებულმა პირმა მიიღო მატერიალური კომპენსაცია.
ელისაშვილზე საერთაშორისო ძებნა გამოცხადდა და სასამართლომ დაუსწრებლად შეუფარდა მას აღკვეთის ღონისძიება პატიმრობის სახით.
სისხლის სამართლის საქმე არსებითი განხილვისთვის დონეცკის სახალხო რესპუბლიკის უზენაეს სასამართლოს გადაეგზავნა." - ნათქვამია რუსეთის გენერალური პროკურატურის ინფორმაციაში.
