როგორც ირაკლი ღარიბაშვილის, ისე მისი ოჯახის უსაფრთხოება არის დაცული, სახელმწიფოს აქვს პასუხისმგებლობა, დაიცვას საკუთარი მოქალაქეების უსაფრთხოება და ამ შემთხვევაშიც უსაფრთხოება არის დაცული, რაზეც არის საუბარი ამ განცხადებაში, ასეთ თეორიულ რისკსაც ვერ ვხედავ, - ამის შესახებ საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე ჟურნალისტის კითხვის საპასუხოდ განაცხადა.
პრემიერმა აღნიშნა, რომ მისთვის უცნობია, რაზე საუბრობს განცხადებაში ღარიბაშვილი, თუმცა მის საქმეზე დამდგარია განაჩენი, დანარჩენი კი სამართალდამცავი უწყებების საქმეა.
„ვნახე ეს განცხადება, არ ვიცი, რაზეა საუბარი. ვიცი ერთი რამ, რომ არის კონკრეტული განაჩენი დამდგარი, დანარჩენი არის მთლიანად სამართალდამცავი ორგანოების საქმე. მე საერთოდ ვერ გავაკეთებ კომენტარს ამ განცხადებაზე, მათ შორის იმის გამო, რომ ირაკლი ღარიბაშვილი ჩემამდე იკავებდა ამ თანამდებობას, შესაბამისად, ჩემთვის ეთიკური თვალსაზრისითაც არ იქნება სწორი მისი განცხადების შეფასება. პრობლემური განცხადებაა, ასე ვიტყოდი. მეტ კომენტარს არ გავაკეთებ. პრობლემური ჩვენთვის არა, პრობლემური თავისთვის. მე მეტ კომენტარს არ გავაკეთებ ეთიკური მოსაზრებებიდან გამომდინარე. იმის გამო, პირველ რიგში, რომ ის ჩემამდე იკავებდა ამ თანამდებობას, შესაბამისად არსებობს რაღაც ეთიკური სტანდარტები, რაც მე მზღუდავს ამ თემაზე განცხადებების გაკეთების შესაძლებლობაში. მისი ოჯახის ინტერესები, რა თქმა უნდა, დაცულია. მე გარანტიას ვიძლევი, რომ ეს უსაფრთხოება დაცულია და ამიტომ არის ჩემთვის გაუგებარი ეს განცხადება, რაც გუშინ გამოქვეყნდა. რა თქმა უნდა, თავიდან ბოლომდე, როგორც მისი, ისე მისი ოჯახის უსაფრთხოება დაცულია. სახელმწიფოს აქვს პასუხისმგებლობა, დაიცვას საკუთარი მოქალაქეების უსაფრთხოება და ამ შემთხვევაშიც უსაფრთხოება არის დაცული. რაზეც საუბარია ამ განცხადებაში, ასეთ თეორიულ რისკსაც ვერ ვხედავ“, - განაცხადა ირაკლი კობახიძემ.
შეგახსენებთ, ირაკლი ღარიბაშვილმა განცხადებას გაავრცელა, სადაც ამბობს, რომ "ეს წერილი გამომიგზავნეს ბიძინა ივანიშვილის დავალებით.
"დიტო ჩუბინიძისნაირმა და ირმა ინაიშვილისნაირმა „მხარდამჭერებმა“ და სოციალურ ქსელებში დაორგანიზებულმა კამპანიებმა ძალიან სერიოზული ეჭვები გააჩინეს და მაგრად დაგვაზიანეს.
ძალიან ინტენსიური მუშაობა მიდის რამდენიმე საქმეზე, რომლების სავარაუდო შედეგი იქნება კორუფციის ბრალდებები. ამიტომ არსებობს ჩვენი მოქმედების ორი ვარიანტი.
1. ვიდავოთ სერიოზულად და ბოლომდე მივაწვეთ.
2. (მეორე ვარიანტი თვითონ შემოგვთავაზე, როგორც კომპრომისული გამოსავალი) - ვაღიაროთ (ჩვენს თავზე ავიღოთ) ერთი რომელიმე საქმე, სადაც შეთანხმებით მოხდეს ყველაფერი, აღიარებაც, მოწმეების მხრიდან ხელის დადებაც და ა.შ. ამ შემთხვევაში გვთავაზობენ საპროცესო შეთანხმებას იგივე 5 წლიანი ვადით, ანუ როგორც მიხსნიან, სასჯელები ერთმანეთს შთანთქავენ და ისევ 5 წელი დარჩება. გამოსვლის შემდეგ არ უნდა გაეკარო პოლიტიკას და თუ „გადადებას გადაწყვეტ“, კორუფციული ბრალდება, რომელიც ნაღიარები გექნება, იქნება დაზღვევის მექანიზმი, რომ პოლიტიკაში დაბრუნება არ იფიქრო“.
სრული განცხადება შეგიძლიათ იხილოთ აქ: ირაკლი ღარიბაშვილი - სამწუხაროდ, სხვა გზა არ დამიტოვეს, ჩემი და ჩემი ოჯახის უსაფრთხოებაზე სრული პასუხისმგებლობა ეკისრება ბიძინა ივანიშვილს და მთელ ხელისუფლებას!
