გამოცხადდება თუ არა ცხრა საეკლესიო დღესასწაული უქმე დღედ - საკანონმდებლო წინადადება პარლამენტში

წინადადების ავტორი საქართველოს მოქალაქე ზაალ წერეთლია და სამოქალაქო უქმეებად გამოცხადების ინიციატივა შემდეგ დღესასწაულებთან მიმართებით გააჩნია:

“ყურადღების მიღმაა დარჩენილი არაერთი უნიშვნელოვანესი საეკლესიო დღესასწაული. 7 მათგანი გაეკუთვნება 12 საუფლო დღესასწაულის კატეგორიას, ხოლო ორი მოციქულთა სწორის და დიდი წმინდანის ხსენების დღეა. მხედველობაში გვაქვს შემდეგი დღესასწაულები:

“ღვთისმშობლის შობა – 21 სექტემბერი, ჯვართამაღლება – 27 სექტემბერი, ღვთისმშობლის ტაძრად მოყვანება – 4 დეკემბერი, მირქმა – 15 თებერვალი, ხარება – 7 აპრილი, ამაღლება – აღდგომიდან მე-40 დღე (ყოველთვის ემთხვევა ხუთშაბათს), ფერისცვალება – 19 აგვისტო, ნინოობა – 27 იანვარი და ნიკოლოზობა – 19 დეკემბერი”, – ვკითხულობთ საკანონმდებლო წინადადებაში.

ავტორი წერს, რომ “ასეთ საზეიმო თარიღებში, თუ ისინი სამუშაო დღეებს ემთხვევა, მოქალაქეები სამსახურის გამო ვერ ახერხებენ ეკლესიაში მისვლას და ღვთისმსახურებები უღიმღამოდ, თითქმის ცარიელ ტაძრებში აღესრულება”.

15 აპრილს, საქართველოს პარლამენტის ბიურომ, შალვა პაპუაშვილის ხელმოწერით, ზაალ წერეთლის წინადადების განხილვა ჯანმრთელობის დაცვისა და სოციალურ საკითხთა კომიტეტს დაევალა.