ვუჩიჩმა სერბეთის საპარლამენტო არჩევნებში მარცხი აღიარა

"ჯერჯერობით საბოლოო შედეგები არ გვაქვს, მაგრამ... ცხადია, რომ ჩვენ ეს არჩევნები წავაგეთ. გაიმარჯვა "სტუდენტურმა სიამ": ისინი 135-დან 140-მდე ადგილს მიიღებენ, ჩვენ კი 105 გვექნება. პარლამენტში სხვა ვერავინ მოხვდა", - განაცხადა ვუჩიჩმა ბელგრადში, "სერბეთის პროგრესული პარტიის" (СНС) შტაბ-ბინაში თავისი მხარდამჭერების წინაშე გამოსვლისას.

მანამდე სერბეთის ცენტრალურმა საარჩევნო კომისიამ განაცხადა, რომ საპარლამენტო არჩევნებზე აქტივობამ 18:00 საათისთვის, უბნების დახურვამდე ორი საათით ადრე, 64,9% შეადგინა - ეს სარეკორდო მაჩვენებელია 1992 წელს იუგოსლავიის დაშლის შემდეგ.

მას შემდეგ, რაც ვუჩიჩმა მარცხი აღიარა, ბელგრადის ქუჩებში სპონტანურად გამოვიდა ხალხის მასა "სტუდენტური სიის" გამარჯვების აღსანიშნავად, წერს სერბული გაზეთი Danas.

ბიულეტენებში 18 საარჩევნო სია იყო წარმოდგენილი, თუმცა ძირითადი კონკურენტები ვუჩიჩის მმართველი პარტია (СНС) და სია "სტუდენტები იმარჯვებენ" გახდნენ. ეს უკანასკნელი 2024 წლის ნოემბერში, ჩრდილოეთ სერბეთის ქალაქ ნოვი-სადის რკინიგზის სადგურზე ჩამონგრევის შემდეგ დაწყებული საპროტესტო აქციების ფონზე გაჩნდა. მაშინ 16 ადამიანი დაიღუპა. კრიტიკოსებმა ტრაგედია ალექსანდრ ვუჩიჩის მთავრობის კორუფციასა და დაუდევრობას დაუკავშირეს.

სექტემბრის ბოლოს ვუჩიჩმა პრეზიდენტის პოსტი დატოვა, რათა თავისი პარტიის გამარჯვების შემთხვევაში მთავრობას ჩასდგომოდა სათავეში. ვუჩიჩის მეორე საპრეზიდენტო ვადა მომავალი წლის მაისში უნდა დასრულებულიყო. მას მესამე ვადით კენჭისყრა აღარ შეეძლო.