უკრაინის პრეზიდენტმა ვოლოდიმირ ზელენსკიმ თავისი ქვეყნის სახელით ამერიკის შეერთებული შტატების პრეზიდენტ ჯო ბაიდენს "თავისუფლებისთვის უკრაინის ბრძოლის ურყევი მხარდაჭერისთვის" მადლობა გადაუხადა.
მას შემდეგ, რაც 21 ივლისს, ჯო ბაიდენმა გამოაცხადა, რომ დემოკრატიული პარტიის და აშშ-ის ინტერესების გამო გადაწყვიტა მეორე ვადით კენჭი აღარ იყაროს, ვოლოდიმირ ზელენსკიმ სოციალურ ქსელში დაწერა, რომ პატივს სცემენ მის რთულ, მაგრამ ძლიერ გადაწყვეტილებას.
უკრაინის პრეზიდენტის განცხადებით, ყოველთვის მადლიერი იქნებიან პრეზიდენტ ჯო ბაიდენის ლიდერობისთვის.
"ბაიდენმა უკრაინას მხარი დაუჭირა ქვეყნის ისტორიის ყველაზე დრამატულ მომენტში და მთელი ამ საშინელი ომის განმავლობაში განაგრძობს უკრაინის დახმარებას. უკრაინასა და მთელ ევროპაში სიტუაცია ისევ რთულია, ვიმედოვნებ, ამერიკის შემდგომი ძლიერი ლიდერობა რუსულ ბოროტებას არ მისცემს წარმატების მიღწევის შესაძლებლობას", – განაცხადა ზელენსკიმ.
