აშშ-ის პრეზიდენტმა დონალდ ტრამპმა დარწმუნებით განაცხადა, რომ აშშ და კუბა შეთანხმებას მიაღწევენ, და აღნიშნა, რომ, მისი აზრით, სამხედრო ჩარევა საჭირო არ იქნება.
"ვიტყოდი, რომ ჩვენ კუბასთან გარიგებას დავდებთ. არ ვფიქრობ, რომ სამხედრო ძალა დაგვჭირდება", — განუცხადა ტრამპმა თეთრ სახლში ჟურნალისტებს, თუმცა არ დაუკონკრეტებია, თუ რა შეთანხმებაზეა საუბარი. როგორც სააგენტო Reuters იხსენებს, ტრამპის ადმინისტრაცია ღიად აცხადებს, რომ მისი მიზანი კუბაში ხელისუფლების შეცვლაა.
წლის დასაწყისში აშშ-ის მიერ დაწესებული ნავთობის ბლოკადის გამო, კუბა საწვავის დეფიციტსა და ელექტროენერგიის მიწოდების შეფერხებებს აწყდება. "ჩვენ გვინდა, დავეხმაროთ კუბას. გვინდა, რომ კუბა ჩვენი მოქალაქეებისთვის გავხსნათ", — განაცხადა ტრამპმა.
ამ კვირაში გაეროს გენერალურ ასამბლეაზე გამოსვლისას, ტრამპმა კუბას "ჩამოშლილი სახელმწიფო" უწოდა და განაცხადა, რომ იქ "თავისუფლება მოვა". მისი სიტყვით გამოსვლისას კუბის დელეგაციამ სხდომათა დარბაზი დატოვა.
კუბის საგარეო საქმეთა მინისტრმა ბრუნო როდრიგესმა განაცხადა, რომ კუბა აშშ-სთან დიალოგისთვის ყოველთვის ღიაა. "ჩვენ ღია ვართ სავაჭრო და ბიზნეს ურთიერთობებისთვის ამერიკულ კომპანიებთან, ისევე როგორც ნებისმიერი სხვა ქვეყნის კომპანიებთან", — თქვა როდრიგესმა.
მას შემდეგ, რაც აშშ თავს დაესხა ვენესუელას და მისი მმართველი ნიკოლას მადურო შეიპყრო, კარაკასმა კუბისთვის ნავთობის მიწოდება შეწყვიტა. "კუბაში აღარ შევა არც ნავთობი და არც ფული — ნული. მე მათ დაჟინებით ვურჩევ, დადონ გარიგება, სანამ გვიან არ არის", — განაცხადა ტრამპმა მადუროს შეიპყრობიდან მალევე.
