სომხეთის ექვსმა ოპოზიციურმა პოლიტიკურმა ძალამ ერთობლივი განცხადება გაავრცელა, რომელშიც 7 ივნისს ჩატარებულ საპარლამენტო არჩევნების შედეგებს აკრიტიკებენ და აცხადებენ, რომ საარჩევნო პროცესი თავისუფალი, სამართლიანი და კონკურენტული არ ყოფილა.
ოპოზიციური პარტიების განცხადებით, არჩევნების პერიოდში, მათ შორის წინასაარჩევნო კამპანიის დროსა და კენჭისყრის დღეს, ადგილი ჰქონდა „სისტემურ და ორგანიზებულ დარღვევებს“, რომლებმაც გავლენა მოახდინა ამომრჩეველთა ნების თავისუფალ გამოხატვაზე, პოლიტიკური კონკურენციის თანაბარ პირობებსა და საზოგადოების ნდობაზე საარჩევნო ინსტიტუტების მიმართ.
ოპოზიციური პარტიები აცხადებენ, რომ ხელისუფლებამ საარჩევნო პროცესში დაუშვა საარჩევნო პრინციპების აშკარა დარღვევები და რამდენიმე ძირითად პრობლემას ასახელებენ.
„1. ადმინისტრაციული რესურსის გამოყენება და ზეწოლა. სახელმწიფო და მუნიციპალური თანამდებობის პირების, ასევე იმავე სტრუქტურების, საგანმანათლებლო და სამედიცინო დაწესებულებებისა და სამართალდამცავი ორგანოების პოლიტიკურ პროცესებში ინტენსიურმა ჩართულობამ შეარყია კონკურენციის თანაბარი პირობები. საჯარო მოხელეებზე ზეწოლამ, სამსახურიდან გათავისუფლების მუქარამ და სისხლის სამართლებრივმა დევნამ შექმნა დამოკიდებულების ატმოსფერო, რომელიც შეუთავსებელია თავისუფალი არჩევნების კონსტიტუციურ პრინციპთან.
2. პოლიტიკური დევნა და დაკავებები. საარჩევნო კამპანიას თან ახლდა ოპოზიციონერი პოლიტიკოსების, აქტივისტებისა და მხარდამჭერების წინააღმდეგ პოლიტიკური დევნის ტალღა. ხელისუფლებამ გამოიყენა დაუსაბუთებელი დაკავებები იმ პირების იზოლაციისთვის, რომლებიც საზოგადოების ნდობით სარგებლობენ. ასეთი სისტემატური ქმედებები განსაკუთრებით აქტიურად გამოიყენებოდა საარჩევნო კამპანიის დროს, რათა საზოგადოებაში შიშის ფართო ატმოსფერო შექმნილიყო.
3. ოპოზიციის საარჩევნო შტაბების მიზანმიმართული დაბლოკვა. არჩევნების წინა დღეს და თავად არჩევნების დღეს, 7 ივნისს, სამართალდამცავმა ორგანოებმა შეაფერხეს საარჩევნო შტაბების მუშაობის პროცესი. ჩხრეკა, შტაბების ნორმალური ფუნქციონირების დარღვევა უსაფუძვლო სამართლებრივი ქმედებებით და ორგანიზატორების დაპატიმრებები მიზნად ისახავდა საარჩევნო პროცესის ზედამხედველობის მექანიზმების ნეიტრალიზებას.
4. მედიისა და პროპაგანდის გამოყენება. საარჩევნო კამპანიის დროს, საზოგადოებრივი და პროსამთავრობო, თუნდაც სახელმწიფო საკუთრებაში არსებული მედია გამოიყენებოდა ოპოზიციის დისკრედიტაციისთვის, საზოგადოების გახლეჩვისა და სიძულვილის ენის გავრცელებისთვის. განსხვავებული აზრის ჩახშობა არღვევდა სამართლიანი კონკურენციის ყველა კონსტიტუციურ ნორმას.
5. ხმის დათვლისა და არჩევნების შედეგების გაუქმება საარჩევნო უბნებზე. დაფიქსირდა არჩევნების შედეგების თვითნებური რედაქტირების შემთხვევები ბევრ საარჩევნო უბანზე და სხვა უკანონო ინსტრუმენტების გამოყენება ცალკეულ საარჩევნო უბნებზე, რამაც გავლენა მოახდინა არჩევნების შედეგებსა და პოლიტიკურ ძალებს შორის ხმების ბალანსზე. ამას თან ახლდა ადმინისტრაციის ხელმძღვანელის მიერ არჩევნების შედეგებში პირდაპირი ჩარევა შედეგების ოფიციალურად გამოცხადებამდე“, – ნათქვამია განცხადებაში.
ოპოზიციური ძალები აცხადებენ, რომ ოფიციალურად გამოქვეყნებული შედეგები არ ასახავს ხალხის ნამდვილ ნებას.
„არჩევნების წარმოდგენილი ოფიციალური მონაცემები არ ასახავს ხალხის ნამდვილ ნებას და არჩევნების ზუსტ შედეგებს. ასეთ პირობებში დაფიქსირებული შედეგები ვერ გახდება ლეგიტიმური ხელისუფლების ფორმირების საფუძველი, რომელსაც მოსახლეობის უმრავლესობის ნდობა ექნება. ნიკოლ ფაშინიანსა და მის ადმინისტრაციას ეკისრებათ სრული პასუხისმგებლობა ქვეყანაში სიტუაციის შემდგომ ესკალაციაზე. ჩვენ გავაგრძელებთ მოქმედებას მხოლოდ კონსტიტუციის, კანონებისა და დემოკრატიული პრინციპების ფარგლებში, დავიცავთ მოქალაქეების გამოხატვის თავისუფლების უფლებებს და სახელმწიფოებრიობისა და დემოკრატიის ფუნდამენტურ ღირებულებებს სომხეთის რესპუბლიკაში. ჩვენს მომავალ გადაწყვეტილებებსა და ქმედებებში მხოლოდ ამ რეალობებით ვიხელმძღვანელებთ“, – ნათქვამია განცხადებაში.
განცხადებას ხელს აწერენ შემდეგი პარტიები: „ძლიერი სომხეთი“, „სომხეთი“, „აყვავებული სომხეთი“, „ნათელი სომხეთი“, “სომხეთის ეროვნული კონგრესი“, „ეროვნული სახალხო პოლუსი“.
