საუდის არაბეთმა წითელ ზღვაში მდებარე იანბუს პორტიდან ნავთობის დატვირთვა აღადგინა "აღმოსავლეთ-დასავლეთის" მილსადენის მუშაობის განახლების შემდეგ, რაც ქვეყანას საშუალებას აძლევს, გვერდი აუაროს ჰორმუზის სრუტეს. ამის შესახებ Reuters ბაზრის წყაროებსა და ნაოსნობის მონაცემებზე დაყრდნობით წერს.
ერაყელი ტერორისტების თავდასხმებმა სამეფო აიძულა, 11 სექტემბერს შეეჩერებინა მილსადენის მუშაობა, რამაც იანბუდან ნედლი ნავთობის ექსპორტის შეწყვეტა გამოიწვია. მილსადენის ფუნქციონირება 22 სექტემბერს აღდგა, თუმცა პორტი მუშაობას მაინც არ აგრძელებდა.
იანბუში ტვირთების გადაზიდვის აღდგენამ ახლო აღმოსავლეთიდან ნავთობის ექსპორტის მოცულობა უნდა გაზარდოს და ენერგორესურსებზე ფასები შეამციროს.
სააგენტოს ორმა სავაჭრო წყარომ ცალ-ცალკე შეაფასა იანბუდან ნედლი ნავთობის გაგზავნის მოცულობა და იგი დღეში დაახლოებით 2 მილიონ ბარელს შეადგენს.
კომპანია Kpler, რომელიც გემების გადაადგილებას ადევნებს თვალს, "აღმოსავლეთ-დასავლეთის" მილსადენის მიმდინარე გამტარუნარიანობას დღეში დაახლოებით 2.65 მილიონ ბარელად აფასებს და ელის, რომ უახლოეს დღეებში ეს მაჩვენებელი დღეში 3–4 მილიონ ბარელამდე გაიზრდება.
თავდასხმამდე არსებული მაჩვენებლების სრულად აღდგენას - დღეში დაახლოებით 5.5 მილიონ ბარელს - შესაძლოა, კიდევ ერთი თვე დასჭირდეს.
ანალიტიკოსების შეფასებით, ჰორმუზის სრუტის გავლით ნავთობის ტრანზიტის საშუალო მაჩვენებელმა (ომანის ყურეში გემებს შორის ტვირთის გადაზიდვის ჩათვლით) 22 სექტემბრის მდგომარეობით, ბოლო 7 დღის განმავლობაში, დღეში 9 მილიონი ბარელი შეადგინა.
ეს 2025 წლის საშუალო მაჩვენებლის დაახლოებით 60%-ს შეადგენს.
იანბუსა და ფუჯაირაში მარაგების წმინდა ზრდის გათვალისწინებით, ახლო აღმოსავლეთიდან ნავთობის ექსპორტის მოცულობა აღწევს იმ დონეს, რაც აშშ-სა და ირანს შორის ომის დაწყებამდე არსებული მაჩვენებლების თითქმის 80%-ს შეადგენს.
