რუსეთში მოლდოვის საქმეთა დროებითი რწმუნებული ალექსანდრუ ჩეტრარუ გამოიძახეს რუსეთის საგარეო საქმეთა სამინისტროში მედიის მიერ გავრცელებული ინფორმაციის ფონზე, რომ კიევისთვის მიწოდებული F-16–ების ტიპის მებრძოლები მოლდოვის აეროდრომებზე განთავსდება.
„მოლდოვის მხარეს მოუწოდეს, მკაცრად დაიცვას ნეიტრალური სტატუსი, რომელიც წარმოადგენს მოლდოვას რესპუბლიკის სახელმწიფოებრიობის საფუძველს და არ გადადგას ნაბიჯები, რომლებიც ხელს შეუწყობს უკრაინის კრიზისის ესკალაციას, რაზედაც მიუთითებს კიშინიოვის ჩართულობა მასში და ექნება დესტრუქციული გავლენა დნესტრისპირეთის ირგვლივ არსებულ ვითარებაზე“, - ნათქვამია რუსეთის საგარეოს განცხადებაში.
მოლდოვის საგარეო საქმეთა სამინისტრომ მოუწოდა რუსეთს, ორიენტირდეს ოფიციალურ წყაროებზე და არა ინტერნეტში გავრცელებულ ყალბ ამბებზე:
„მოლდოვის რესპუბლიკა არ იღებს და არ მიიღებს იარაღს და სამხედრო აღჭურვილობას, მათ შორის უკრაინისთვის განკუთვნილ თვითმფრინავებს. მოლდოვის რესპუბლიკა ნეიტრალური სახელმწიფოა და მისი ინსტიტუტები გააგრძელებენ ნეიტრალიტეტის პრინციპის პატივისცემას. ამასთან დაკავშირებით საგარეო საქმეთა სამინისტრო შეახსენებს, რომ ერთადერთი ქვეყანა, რომელიც მოლდოვას რესპუბლიკის ტერიტორიაზე არალეგალურად ათავსებს ჯარს და საბრძოლო მასალას ხელისუფლების თანხმობის გარეშე, არის რუსეთის ფედერაცია".
