საფრანგეთის ქალაქ ნიცის მუნიციპალიტეტმა ახალი რეგულაცია აამოქმედა, რომლის მიხედვითაც, ზაფხულის ძლიერი სიცხის პერიოდში შინაური ცხოველების (ძაღლების, კატების და სხვ.) ავტომობილში მარტო დატოვება მკაცრად იკრძალება. გადაწყვეტილების მთავარი მიზანი ცხოველების დაცვა და ფატალური შედეგების პრევენციაა.
ადგილობრივი ხელისუფლების განმარტებით, აღნიშნული ზომა აუცილებელი გახდა, რადგან მაღალი ტემპერატურის პირობებში დახურულ სატრანსპორტო საშუალებაში მყოფი ცხოველის სიცოცხლეს უმოკლეს დროში ექმნება რეალური საფრთხე.
ექსპერტებისა და ვეტერინარების გაფრთხილებით, მზიან და ცხელ ამინდში ავტომობილის სალონში ტემპერატურა სულ რაღაც 10-15 წუთში შეიძლება კრიტიკულ ნიშნულამდე გაიზარდოს. ფანჯრის მცირედით ჩამოწევა ან მანქანის ჩრდილში გაჩერება შინაური ცხოველის გადასარჩენად საკმარისი არ არის.
ახალი აკრძალვის საფუძველზე, პოლიციასა და სამაშველო სამსახურებს უფლებამოსილება ეზრდებათ. თუ ცხოველი სალონში გამოკეტილია და მას საფრთხე ემუქრება, სამართალდამცველებს უფლება აქვთ, დაუყოვნებლივ იმოქმედონ — მათ შორის, ჩაამსხვრიონ ავტომობილის მინა მის გამოსაყვანად.
წესის დამრღვევ პირებს სოლიდური ფინანსური ჯარიმები დაეკისრებათ. გარკვეულ შემთხვევებში, ქმედება შესაძლოა, დაკვალიფიცირდეს როგორც ცხოველის მიმართ გაუფრთხილებლობა ან სასტიკი მოპყრობა.
