სომხეთის პრემიერ-მინისტრმა, ნიკოლ ფაშინიანმა განმარტა, რატომ არ შეუერთდა ქვეყანა ევროპული უსაფრთხოების ფუნდამენტური პრინციპების შესახებ დუბლინში მიღებულ დეკლარაციას.
„ჩვენ ერთი მიზეზის გამო არ შევუერთდით. პარტნიორებს ღიად ვუთხარი, რომ დოკუმენტში ნატო-ზე ძალიან ბევრი მითითება იყო. ჩვენ ვთქვით, რომ, დიახ, ევროკავშირში გაწევრიანების პროცესი დავიწყეთ, თუმცა ნატო-ში გაწევრიანების გადაწყვეტილება არ მიგვიღია და ასეთი მიზანიც არ დაგვისახავს“, – განაცხადა ფაშინიანმა.
მისივე თქმით, დეკლარაციის სხვა ნაწილები სომხეთისთვის მისაღები და მნიშვნელოვანი იყო. სომხეთის პრემიერის განმარტებით, მთავრობა ერთმანეთისგან განასხვავებს ევროკავშირში გაწევრიანებასა და სამხედრო-პოლიტიკურ ალიანსში შესვლას.
ცნობისთვის, დუბლინში, ევროპის პოლიტიკური გაერთიანების სამიტის ფარგლებში, ევროპის უსაფრთხოების ძირითადი პრინციპების შესახებ ერთობლივი დეკლარაცია საფრანგეთის ინიციატივით მიიღეს. მას ხელი 40-მა ქვეყანამ, მათ შორის, საქართველომ მოაწერა.
თარგმანი საქართველოს საზოგადოებრივი მაუწყებელი







