სომხეთის პრემიერ-მინისტრმა ნიკოლ ფაშინიანმა პრემიერ-მინისტრის თანამდებობიდან გადადგომის შესახებ განაცხადა. ის თანამდებობიდან მთელ კაბინეტთან ერთად გადადგა. ფაშინიანმა ამის შესახებ განცხადება მთავრობის სხდომაზე გააკეთა, რომელიც „არმენპრესმა“ გადასცა.
„ეს ჩვენი მთავრობის ბოლო სხდომაა. კვირას მე-9 პარლამენტის ფორმირების გამო გადავდგებით“, - განაცხადა ნიკოლა ფაშინიანმა.
როგორც მედია იუწყება, ეს პროცედურა ფორმალობაა, რადგან სომხეთის მე-8 მოწვევის პარლამენტის მანდატი ივლისის ბოლოს იწურება. ახალი პარლამენტის პირველი სხდომა 2 აგვისტოს გაიმართება.
ნიკოლ ფაშინიანი პრემიერ-მინისტრობის სავარაუდო კანდიდატია, რადგან სომხეთის პრეზიდენტმა ახალი პრემიერ-მინისტრი იმ პარტიის ნომინირებული წევრებიდან უნდა დანიშნოს, რომელმაც საპარლამენტო არჩევნებში ყველაზე მეტი ხმა მიიღო.
7 ივნისს სომხეთში გამართულ საპარლამენტო არჩევნებში სომხეთის პრემიერ-მინისტრის „სამოქალაქო კონტრაქტის“ პარტიამ ხმების 49,81 პროცენტი მიიღო.
მეორე ადგილზე რუსი ბიზნესმენის, სამველ კარაპეტიანის, „ძლიერი სომხეთის“ პარტია გავიდა, რომელმაც 23,29 პროცენტი მიიღო. მესამე ადგილზე ყოფილი პრეზიდენტის, რობერტ ქოჩარიანის „ალიანსი სომხეთია“ 9,94 პროცენტით.
