58 წლის ასაკში პოეტი, მსახიობი და რეჟისორი ალექსანდრე (საშა) გველესიანი გარდაიცვალა. ინფორმაციას სოციალურ ქსელში მისი ახლობლები ავრცელებენ.
საშა გველესიანს გამოცემული აქვს ხუთი პოეტური კრებული - „ქარის წისქვილები“, „სულ ცოტა...“, „ლექსები“, „ასათიანის 22“ და „მე-დიდი დათვი“.
სხვადასხვა დროს მუშაობდა მსახიობად, მეტყველების პედაგოგად, ზესტაფონის კულტურის ცენტრის ახალგაზრდული და თოჯინების თეატრების რეჟისორად.
ფილოლოგიის მეცნიერებათა დოქტორი გია მურღულია წერს:
"საშა გველესიანი მოვლენა იყო ქართულ პოეზიაში.
ეს "იყო", სამწუხაროდ, დღეიდან კანონიერია.
დრო გავა და საქართველო მას გაცილებით მეტად დააფასებს, ვიდრე ახლა.
ქართული სიტყვა, მეტყველების მელოდია, რიტმი და განწყობა მის ლექსებში პირვანდელი ბუნებრიობით გრძნობენ თავს.
ძნელია თქვა: "ის აღარ არის".
უფრო ადვილი და სამართლიანიც ასე თქმაა:
"ის წავიდა, რათა დარჩეს".




