უკრაინის ეროვნულმა ანტიკორუფციულმა ბიურომ ბიზნესმენი იგორ კოლომოისკი PrivatBank-იდან 9.2 მილიარდი გრივნის გაფლანგვაში დაადანაშაულა. ამ ინფორმაციას ბიუროს პრესსამსახური ავრცელებს.
გამომძიებლების თქმით, კოლომოისკიმ 2015 წლის დასაწყისში შეიმუშავა გეგმა PrivatBank-ის სახსრების მითვისების მიზნით, რათა "შემდეგ დაეფინანსებინა მის მიერ კონტროლირებადი ოფშორული კომპანია და გაეზარდა საკუთარი წილი ბანკის საწესდებო კაპიტალში."
ამისათვის ბანკი ხელოვნურად იყო ვალდებული 9.2 მილიარდ გრივნაზე მეტი გადაეხადა კოლომოისკის მიერ კონტროლირებადი კომპანიისთვის იმ საბაბით, თითქოს საკუთარი ობლიგაციები გაბერილ ფასად შეისყიდა.
ამ თანხის ნაწილი მოგვიანებით სამი დაკავშირებული კომპანიის ანგარიშებზე, ფასიანი ქაღალდების ყიდვა-გაყიდვის ოპერაციების საფარქვეშ გადაირიცხა, შემდეგ კი კიდევ ორი იურიდიული პირის ანგარიშებზე. ფული საბოლოოდ კოლომოისკის პირად ანგარიშზე დაირიცხა და მან ის PrivatBank-ის საწესდებო კაპიტალში შეიტანა.
კოლომოისკი სექტემბრის დასაწყისში დააკავეს. უკრაინის უსაფრთხოების სამსახურმა გაავრცელა ინფორმაცია, რომ ბიზნესმენი ეჭვმიტანილია თაღლითობასა და დანაშაულებრივი გზით მოპოვებული ქონების ლეგალიზაციაში.
გამოძიების თანახმად, კოლომოისკიმ 2013-2020 წლებში საბანკო სტრუქტურების მეშვეობით საზღვარგარეთ ნახევარ მილიარდზე გრივნაზე (დაახლოებით 14 მილიონი დოლარი) მეტი "გაათეთრა".
