აშშ-ს პრეზიდენტმა, დონალდ ტრამპმა განაცხადა, რომ აპირებს ჰონდურასის ყოფილ პრეზიდენტ ხუან ორლანდო ერნანდესს "სრული და უპირობო შეწყალება" მიანიჭოს. ერნანდესი ამჟამად 45-წლიან ფედერალურ სასჯელს იხდის.
ტრამპის თქმით, ერნანდესი უმართებულოდ მკაცრად იქნა გასამართლებული და მისი შეწყალება დიდ უსამართლობას გამოასწორებს.
ბრალდების მიხედვით, ერნანდესი პრეზიდენტობის წლებში ნარკოკარტელებს ეხმარებოდა, მათგან მილიონობით დოლარს იღებდა და სანაცვლოდ ასობით ტონა კოკაინის აშშ-ს მიმართულებით უსაფრთხოდ გატანას უზრუნველყოფდა.
ტრამპის განცხადება მას შემდეგ გავრცელდა, რაც პრეზიდენტის ადმინისტრაცია კარიბის რეგიონში ანტინარკოტიკული სამხედრო ოპერაციების გაძლიერებაზე მუშაობს. ერნანდესის ადვოკატმა ტრამპს მადლობა გადაუხადა და თქვა, რომ ჰონდურასში ყოფილი პრეზიდენტის ტრიუმფალურ დაბრუნებას ელიან.
შეწყალების შესახებ განცხადებას თან ჰონდურასის კონსერვატიული კანდიდატის, ტიტო ასფურას მიმართ აშშ-ს პრეზიდენტის მკაფიო პოლიტიკური მხარდაჭერა ახლდა.
