ამის შესახებ დონალდ ტრამპი truthsocial-ით აცხადებს.
შეერთებული შტატების პრეზიდენტმა დონალდ ტრამპმა ბათილად ცნო მისი წინამორბედი ჯო ბაიდენის მიერ პრეზიდენტობის ბოლო საათებში გამოცემული აქტი, რომლითაც წინასწარ იქნენ შეწყალებულები 2021 წლის 6 იანვარს მომხდარი კონგრესის ბლოკირების ფაქტის შემსწავლელი კომიტეტის წევრები.
დონალდ ტრამპის თქმით, დოკუმენტები შეიქმნა ავტომატური ხელმოწერით და, რაც კიდევ უფრო მნიშვნელოვანია, ისე, რომ ბაიდენმა ამის შესახებ არ იცოდა.
მძინარე ჯო ბაიდენის მიერ მინიჭებული „შეწყალება“ ცხადდება ბათილად, იურიდიული ძალის და ეფექტის არ მქონედ. ბაიდენმა მას ხელი არ მოაწერა. მას არ წარუდგინეს შეწყალებისთვის აუცილებელი დოკუმენტაცია, არ მისცეს შესაბამისი განმარტებები. ჩემ და სხვა უდანაშაულო ადამიანების წინააღმდეგ გამოცხადებული კუდიანებზე ნადირობის ორწლიან პერიოდში შეგროვებული დოკუმენტაციის განადგურებაში მონაწილე პირებმა უნდა იცოდნენ, რომ მათი საქმეები უმაღლეს დონეზე იქნება გამოძიებული, - წერს დონალდ ტრამპი.
პრეზიდენტის პოსტზე ყოფნის ბოლო საათებში ჯო ბაიდენმა წინასწარ შეიწყალა კაპიტოლიუმის ალყის გამოძიებაში მონაწილე სახელმწიფო მოხელეები, აშშ-ს შეიარაღებული ძალების გაერთიანებული შტაბის ყოფილი თავმჯდომარე მარკ მილი, აშშ-ს ყოფილი მთავარი ინფექციონისტი ენტონი ფაუჩი და თავისი ოჯახის წევრები.
