აშშ-ის პრეზიდენტის, დონალდ ტრამპის სპეციალური წარმომადგენელი ახლო აღმოსავლეთში, სტივ უიტკოფი, სავარაუდოდ, ხვალ მოსკოვში ჩავა და რუსეთის პრეზიდენტს, ვლადიმერ პუტინს შეხვდება. ინფორმაციას CNN ავრცელებს.
ამერიკული ტელეარხის ცნობით, აშშ-ის ადმინისტრაცია კვლავ არ იშურებს ძალისხმევას, რათა უკრაინაში კრიზისი დაასრულოს.
უიტკოფისა და პუტინის შეხვედრა გუშინ ლონდონში გამართული მოლაპარაკებების შემდეგ მოხდება. CNN აღნიშნავს, რომ დიდ ბრიტანეთში მოლაპარაკებებში მონაწილეობაზე აშშ-ის სახელმწიფო მდივანმა, მარკო რუბიომ უარი თქვა. ლონდონში ამერიკულ მხარეს მხოლოდ ტრამპის სპეცწარმომადგენელი უკრაინაში, კიტ კელოგი წარმოადგენდა.
