„ოპოზიციის მცდელობა, უცხოურ ლობიზმში დახარჯული თანხის საშუალებით მოახდინონ რევოლუცია ქვეყანაში, ფუჭია,“ - წერს სოციალურ ქსელში პარტია „ხალხის ძალის“ გენერალური მდივანი დიმიტრი ხუნდაძე.
მისივე თქმით, ევროპარლამენტის მიერ მიღებულ რეზოლუციას რეკომენდაციის სახე აქვს, რომელიც ან იქნება გათვალისწინებული, ან არა. რაც შეეხება საქართველოსთვის ვიზალიბერალიზაციის გაუქმებას, ხუნდაძე განმარტავს, რომ პროცედურულადაც ეს შეუძლებელია.
„ევროპარლამენტის გუშინდელი რეზოლუცია იყო კიდევ ერთი პროვოკაცია ქართველი ხალხისთვის, როგორმე ქუჩაში გამოეყვანათ ოპოზიციის მხარდამჭერები გამჭვირვალობის კანონის წინააღმდეგ.
საზოგადოებისთვის განვმარტავ, რომ რეზოლუციას აქვს რეკომენდაციის სახე, რომელსაც ან გაითვალისწინებ, ან არა. რაც შეეხება ვიზალიბერალიზაციის გაუქმებას, ამ მიზეზით და პროცედურულადაც ეს შეუძლებელია. აქედან გამომდინარე, ადვილი მისახვედრია, თუ რისი მიღწევა სურდათ ამ დეზინფორმაციის საშუალებით.
ოპოზიციის მცდელობა, უცხოურ ლობიზმში დახარჯული თანხის საშუალებით მოახდინონ რევოლუცია ქვეყანაში, ფუჭია. ქართული საზოგადოება გონიერია და ასეთ მარტივ მახეზე არ წამოეგება. გუშინდელმა დღემაც აჩვენა, რომ სააკაშვილის ლობისტების კიდევ ერთ დიდ პროვოკაციაზე ქართველი ხალხის რეაქცია იყო ღიმილის მომგვრელი. დაშინება - შეშინების დოკუმენტებს მიჩვეული ვართ და ეს ჩვენთვის უცხო არ არის. მაგრამ, აქ მთავარი ხელისუფლების ქმედებაა საზოგადოებასთან ერთად - საქართველო სუვერენული სახელმწიფოა და ერთი მხარის პოლიტიკური ლობისტების სუბიექტურ დირექტივებს ქვეყანა არ შეასრულებს.
რაც შეეხება მიხეილ სააკაშვილის გათავისუფლებას, კარგია, რომ ბოლოს და ბოლოს ამ აქციებს ფარდა აეხადა და დღის წესრიგში დადგა ის საკითხი, რაც ოპოზიციას ყველაზე მეტად აღელვებს - დამნაშავე სააკაშვილის გათავისუფლება. აქაც სახელმწიფო იმოქმედებს კანონის სრული დაცვით და ქვეყნის ინტერესებიდან გამომდინარე. საქართველო არის შემდგარი სახელმწიფო და ვერავინ გვიბრძანებს, თუ რა უნდა გავაკეთოთ ქვეყნის შიგნით. პარტნიორობა სხვა რამეა და გუშინდელი ევროპარლამენტარების ნაწილის სამარცხვინო რეზოლუცია, სხვა რამ. ჩვენ მზად ვართ თანასწორუფლებიანი თანამშრომლობისთვის და გვჯერა, რომ საქართველო აუცილებლად იქნება ღირსეული ევროპის ღირსეული წევრი,“ - წერს დიმიტრი ხუნდაძე.
შეგახსენებთ, ევროპარლამენტმა საქართველოში "უცხოური გავლენის გამჭვირვალობის კანონპროექტთან" დაკავშირებით რეზოლუცია მიიღო. მას მხარი დაუჭირა 425-მა ევროპარლამენტმა, წინააღმდეგ 25 წავიდა, თავი შეიკავა 30-მა ევროპარლამენტარმა. - ევროპარლამენტი ევროსაბჭოსა და პარტნიორებს მოუწოდებს, ივანიშვილისთვის პირადი სანქციების დაწესება განიხილონ
საქართველოში ამერიკის ყოფილი ელჩის თქმით, კანონი "უცხოელი აგენტების" შესახებ, შესაძლოა, შემოიღონ იმის უზრუნველსაყოფად, რომ არ არსებობდნენ საერთაშორისო დამკვირვებლები
ცნობისთვის, საქართველოს პარლამენტმა პირველი მოსმენით „უცხოური გავლენის გამჭვირვალობის" კანონპროექტი მიიღო
2024 წლის 16 აპრილს საქართველოს პრეზიდენტმა სალომე ზურაბიშვილმა შარლ მიშელსა და ემანუელ მაკრონს მიმართა, საქართველოში განვითარებული მოვლენები ევროპული საბჭოს ხვალინდელ სხდომაზე განიხილონ, მიუხედავად იმისა, რომ საკითხი სხდომის დღის წესრიგში შეტანილი არ არის..
2024 წლის 9 აპრილს "კი ევროპას! არა რუსულ კანონს!" - თბილისში მსვლელობა დაიწყო, რომელიც, საპროტესტო აქციებით დღემდე გრძელდება
