პრეზიდენტმა დონალდ ტრამპმა შენობების ესთეტიკური მხარისადმი გამოიჩინა ყურადღება და აღმასრულებელი ბრძანებით ტრადიციული და კლასიკური არქიტექტურა ფედერალური შენობების სასურველ სტილად გამოაცხადა.
„შესაბამისი ფედერალური საჯარო შენობები უნდა ამაღლებდეს და ალამაზებდეს საზოგადოებრივ სივრცეებს, შთააგონებდეს ადამიანის გონებას, აკეთილშობილებდეს შეერთებულ შტატებს და იმსახურებდეს ფართო საზოგადოების პატივისცემას. ისინი ასევე ვიზუალურად უნდა ამოიცნობოდნენ როგორც სამოქალაქო შენობები და, საჭიროების შემთხვევაში, უნდა ასახავდნენ რეგიონულ არქიტექტურულ მემკვიდრეობას“, - ნათქვამია დონალდ ტრამპის ბრძანებულებაში.
ტრამპი აღნიშნავს, რომ „არქიტექტურა, განსაკუთრებით ტრადიციული და კლასიკური არქიტექტურა, რომელიც აკმაყოფილებს ამ ქვეთავში მითითებულ კრიტერიუმებს, წარმოადგენს ფედერალური საჯარო შენობებისთვის სასურველ არქიტექტურას. კოლუმბიის ოლქში, კლასიკური არქიტექტურა ფედერალური საჯარო შენობებისთვის სასურველ და სტანდარტულ არქიტექტურას წარმოადგენს, თუ გამონაკლისი ფაქტორები არ მოითხოვს სხვა ტიპის არქიტექტურას“.
მისი ბრძანებით სხვა არქიტექტურული სტილები არ არის აკრძალული.
ბრძანებულების ტექსტის თანახმად, „კლასიკური და ტრადიციული არქიტექტურა არქიტექტურული დიზაინის სასურველ რეჟიმებს წარმოადგენს“, მაგრამ „ეს უპირატესობა არ გამორიცხავს ალტერნატიული სტილის შესაძლებლობას შესაბამის გარემოებებში“.
შენობების ესთეტიკურ მხარესთან ერთად და პრეზიდენტი ითვალისწინებს ხარჯებსა და საიმედოობას.
„პროექტები უნდა შეესაბამებოდეს ჯანსაღ სამშენებლო პრაქტიკას და გამოიყენოს დადასტურებული საიმედოობის მქონე მასალები, მეთოდები და აღჭურვილობა. შენობები უნდა იყოს ეკონომიური მშენებლობის, ექსპლუატაციისა და მოვლა-პატრონობისათვის და ხელმისაწვდომი უნდა იყოს შეზღუდული შესაძლებლობის მქონე პირებისთვის“, - ნათქვამია ბრძანებაში.
