უკრაინაზე რუსეთის მიერ 28 აგვისტოს განხორციელებულ თავდასხმასთან დაკავშირებით ევროკავშირის უმაღლესი წარმომადგენელი ავრცელებს განცხადებას, რომელსაც უნგრეთის გარდა, ევროკავშირის ყველა წევრი ქვეყანა და გაერთიანებული სამეფო უჭერენ მხარს.
განცხადებაში ევროკავშირის წევრები და ბრიტანეთი სამძიმარს და სოლიდაობას უცხადებენ უკრაინას, რუსეთის ბოლო მასირებული იერიშის გამო, რომელსაც 23 ადამიანი ემსხვერპლა, მკაცრად გმობენ რუსეთის თავდასხმას მოქალაქეებსა და სამოქალაქო ინფრასტრუქტურაზე, რაც, მათი შეფასებით, არის მიზანმიმართული ესკალაცია და მშვიდობისკენ ძალისხმევისთვის ძირის გამოთხრა.
განცხადებაში აღნიშნულია, რომ თავდასხმის შედეგად ასევე დაზიანდა კიევში ევროკავშირის დელეგაციის შენობები, რაც კიდევ ერთხელ აჩვენებს რუსეთის თავდასხმების უგუნურ ბუნებას და საერთაშორისო სამართლის უგულებელყოფას. ასევე აღნიშნულია, რომ კიევში ბრიტანეთის საბჭოს შენობაც მნიშვნელოვნად დაზიანდა და დაცვის თანამშრომელი დაშავდა.
როგორც განცხადებაშია ნათქვამი, დიპლომატებისა და დიპლომატიური პერსონალის სიცოცხლის საფრთხეში ჩაგდება დიპლომატიური ურთიერთობების შესახებ ვენის კონვენციის აშკარა დარღვევაა.
„მშვიდობიანი მოსახლეობისა და არასამხედრო ობიექტების წინააღმდეგ განზრახ თავდასხმები ომის დანაშაულებია. საერთაშორისო ჰუმანიტარული სამართლის ამ მძიმე დარღვევების ჩამდენმა ყველა მეთაურმა, დამნაშავემ და თანამონაწილემ უნდა აგოს პასუხი. ეს დანაშაულები მხოლოდ აძლიერებს ჩვენს მტკიცე გადაწყვეტილებას, მხარი დავუჭიროთ უკრაინას და მის ხალხს რუსეთისგან თავდაცვისა და ყოვლისმომცველი, სამართლიანი, მდგრადი მშვიდობისკენ სწრაფვის საქმეში. ევროკავშირი გააგრძელებს და გაზრდის უკრაინისადმი ყოვლისმომცველ მხარდაჭერას ყველა მიმართულებით, მათ შორის სანქციების მე-19 პაკეტზე მუშაობის დაჩქარებით“, – ნათქვამია განცხადებაში.
ევროკავშირის უმაღლესი წარმომადგენლისა და 26 წევრი ქვეყნის განცხადების თანახმად, 2025 წლის მარტიდან უკრაინა ერთგულია სრული და უპირობო ცეცხლის შეწყვეტის და არაერთხელ გამოთქვა მზადყოფნა მშვიდობისთვის, მაშინ, როდესაც რუსეთმა გააძლიერა თავდასხმები მშვიდობიან მოსახლეობასა და სამოქალაქო ინფრასტრუქტურაზე.
„ჩვენ გავაგრძელებთ თანამშრომლობას საერთაშორისო პარტნიორებთან, მათ შორის, აშშ-თან, რათა რუსეთის აგრესიული ომი ყოვლისმომცველი, სამართლიანი და მდგრადი მშვიდობით დასრულდეს. რუსეთმა უნდა შეწყვიტოს მკვლელობები და გამოავლინოს მშვიდობისადმი ჭეშმარიტი სურვილი“, – ნათქვამია განცხადებაში.
თარგმანი: პირველი არხი
