„დედაქალაქის სატრანსპორტო სისტემის სრულყოფის პროცესი დაწყებულია, აქტიურ ფაზაშია და გეგმაზომიერად მიმდინარეობს“, - განაცხადა თბილისის საკრებულოს სატრანსპორტო საკითხთა კომისიის თავმჯდომარემ, შალვა ოგბაიძემ, საკრებულოს სხდომაზე, სადაც დედაქალაქის მერის, კახა კალაძის, ანგარიში მოისმინეს და თბილისის 2024 წლის ბიუჯეტი დაამტკიცეს.
„სატრანსპორტო პოლიტიკა და ამ მიმართულებით არსებული გამოწვევების დაძლევა ჩვენი დედაქალაქისთვის ერთ-ერთი პრიორიტეტული მიმართულებაა. სწორედ ამიტომ დედაქალაქის სატრანსპორტო პოლიტიკა საზოგადოებრივი ტრანსპორტის განვითარებასა და ქვეითების უსაფრთხო გადაადგილებაზეა ორიენტირებული“, - განაცხადა საკრებულოს წევრმა.
მისივე თქმით, სატრანსპორტო სისტემის მოწესრიგების, სრულყოფის და მისი გამართული ფუნქციონირების უზრუნველყოფის მიმართულებით წელსაც არაერთი მნიშვნელოვანი ღონისძიება განხორციელდა.
„რა თქმა უნდა, რეფორმას თან ახლავს გარდამავალი და საადაპტაციო პერიოდისათვის დამახასიათებელი სირთულეები, თუმცა უმთავრესია ის, რომ სისტემის სრულყოფის პროცესი დაწყებულია, აქტიურ ფაზაშია და მიმდინარეობს გეგმაზომიერად, რასაც მოწმობს თუნდაც ისეთი ღონისძიებები, როგორებიცაა: 18-მეტრიანი ავტობუსების შესყიდვა, მეტროს ვაგონების განახლება თუ მიმდინარე მსხვილი საგზაო ინფრასტრუქტურული პროექტები ხორცშესხმა და სხვა.
ეს ყოველივე ერთობლიობაში მიუთითებს, რომ ტრანსპორტის განვითარება, დედაქალაქის მაცხოვრებელთა სწრაფი, კომფორტული და ხელმისაწვდომი გადაადგილება კვლავაც დედაქალაქისთვის ერთ-ერთ უმნიშვნელოვანეს ამოცანად რჩება დედაქალაქისთვის“, - განაცხადა შალვა ოგბაიძემ.
