შინაგან საქმეთა სამინისტროს ოფიციალური ინფორმაციით, დაკავებულია კოალიცია "ძლიერი საქართველო - ლელოს” ერთ-ერთი ლიდერი, ალექსანდრე ელისაშვილი, რომელმაც დღეს დილით, გამთენიისას, თბილისის საქალაქო სასამართლოს კანცელარიის შენობის დაწვა სცადა
ელისაშვილის ადვოკატი, გიორგი რეხვიაშვილი მედიასთან აცხადებს, რომ კოალიცია "ძლიერი საქართველო - ლელოს" ერთ-ერთი ლიდერის დაკავება პოლიტიკური დევნაა და მას დანაშაული არ ჩაუდენია.
"ვვარაუდობ, რომ დასჭირდათ ახალი საქმე, ახალი მტკიცებულებების შეგროვება, რათა ეს აქტიური პოლიტიკოსი რაღაც გზით გააჩერონ. ჩემი აზრით, ეს არის პოლიტიკური დევნა და ამ შემთხვევაში, არანაირ დანაშაულს ადგილი არ აქვს. გამორიცხულია, რომ მთაწმინდაზე მცხოვრები ადამიანი მიდიოდეს ღამის საათებში სასამართლოსთან და უკიდებდეს ცეცხლს, ცეცხლის წაკიდების მცდელობა ჰქონდეს. ბევრი სახელმწიფო სტრუქტურა არსებობს მისი სახლის მიმდებარე ტერიტორიაზე, მსგავსი დანაშაულის ჩადენის სურვილი რომ ჰქონოდა, შეძლებდა თავისი სახლის ახლოს განეხორციელებინა და არა ამხელა მანძილზე", - აცხადებს ალეკო ელისაშვილის ადვოკატი გიორგი რეხვიაშვილი.
