წლიდან წლამდე, სამტრედიის მუნიციპალიტეტის მერიის სოციალურ პროგრამებში ქვეპროგრამები იქმნება და მოქალაქეების დასახმარებლად საჭიროებისამებრ გამოიყენება.
მიმდინარე წლის ბიუჯეტში არსებული თანხების გამოყენებით, პირველად სამტრედიაში, ავარიულ სახლებში მცხოვრები 4 ოჯახისთვის ახალი საცხოვრებელი სახლების მშენებლობა დაიწყო.
მუნიციპალიტეტის ბიუჯეტის ასიგნებით გათვალისწინებული სოციალური პროგრამის ფარგლებში, გასულ წელს, სამტრედიაში 5000-ზე მეტ ადამიანს გაეწია დახმარება როგორც სოციალური, ისევე ჯანდაცვის პროგრამებით. პროგრამების განახლების პარალელურად შესაძლებელი გახდა იმ სოციალურად დაუცველი ოჯახებისთვის სახლის აშენება, რომლებიც წლებია გაუსაძლის პირობებში ცხოვრობენ საკუთარ, დარეგისტრირებულ მიწის ფართობზე.
დღეს სახლების მშენებლობის პროცესს მუნიციპალიტეტის მერი, დავით ბახტაძე, მერიის სოციალური სამსახურის ხელმძღვანელთან ლევან ახობაძესთან და ზედამხედველობის სამსახურის უფროსთან ამირან თევდორაძესთან ერთად გაეცნო.
დავით ბახტაძე -,,მიუხედავად სახელმწიფოში არსებული გრძელვადიანი განსახლების სერვისისა, ზემოთ აღნიშნული სეგმენტი ვერცერთ კატეგორიაში ვერ მოხვდა. შესაბამისად, გადავწყვიტეთ წელს დაგვეწყო ეს უპრეცედენტო პროექტი და 4 ოჯახისთვის სახლი აგვეშენებინა. ვფიქრობ, ეს არის მიზანმიმართული ხარჯი და მომდევნო წლებში კიდევ უფრო მეტი გაკეთდება ამ მიმართულებით.”
ხელისუფლების მიმართ მადლიერებას თავად ბენეფიციარები გამოხატავენ.
შორენა ღვინიანიძე-,,უღრმესი მადლობა სამტრედიის მუნიციპალიტეტის მერიას და ბატონ დავით ბახტაძეს. ჩემს დანგრეულ სახლს ახლით მიცვლიან. თავადაც ხედავთ მშენებლობა მიმდინარეობს. მადლობის მეტი არაფერი მეთქმის.”
ინფორმაციას სამტრედიის მერია ავრცელებს.
