ჩვენს გუნდსა და ამერიკის მოქმედ ადმინისტრაციას შორის გაცხადებული თანხვედრაა ყველა საკითხთან დაკავშირებით. ჩვენი მხრიდან ყოველთვის იყო მზაობა და მომავალშიც იქნება, რომ რეალურად ჩამოყალიბდეს პარტნიორული ურთიერთობა, რომელიც წარსულში მხოლოდ და მხოლოდ ფურცელზე იყო დაწერილი, – ამის შესახებ საპარლამენტო უმრავლესობის წევრმა, არჩილ გორდულაძემ განაცხადა.
მისივე თქმით, ირაკლი კობახიძისადმი გაგზავნილი დონალდ ტრამპის წერილიც „ქართულ ოცნებას“ ამ კუთხით ოპტიმიზმით განაწყობს.
„ამერიკის პრეზიდენტის წერილიც ვიხილეთ. რა თქმა უნდა, ეს ფრთხილი ოპტიმიზმით განგვაწყობს. ამ შემთხვევაში მნიშვნელოვანია, რომ ჩვენი ქვეყნის ინტერესები მუდმივად იყოს დაცული. ამავდროულად, გვესმის, რომ ყველა ქვეყანას თავისი ინტერესები აქვს და ამ ინტერესების თანხვედრაში შესაძლებელია, საბოლოო ჯამში, პარტნიორული ურთიერთობა იყოს უზრუნველყოფილი, რისთვისაც საქართველოს ხელისუფლება ყოველთვის მზადყოფნას გამოვთქვამთ“, – განაცხადა არჩილ გორდულაძემ.
ცნობისთვის, აშშ-ის პრეზიდენტმა დონალდ ტრამპმა საქართველოს პრემიერ-მინისტრს, ირაკლი კობახიძეს წერილი გაუგზავნა და ამერიკის დამოუკიდებლობის 250-ე იუბილეს მილოცვისთვის მადლობას გადაუხადა. ტრამპმა წერილში აღნიშნა: „სუვერენიტეტის, უსაფრთხოებისა და ხანგრძლივი კეთილდღეობის მხარდასაჭერად ერთობლივი მუშაობით შეგვიძლია მნიშვნელოვანი პროგრესის მიღწევა. მოუთმენლად ველოდები ჩვენი თანამშრომლობის გაძლიერებას, რათა ერთად ვიაროთ მეტად უსაფრთხო, აყვავებული და მშვიდობიანი მომავლისკენ“.
