2030 წლის მსოფლიო ჩემპიონატს ძალოსნობაში მოსკოვი უმასპინძლებს. ეს გადაწყვეტილება ძალოსნობის საერთაშორისო ფედერაციის (IWF) აღმასკომის სხდომაზე მიიღეს, სადაც მომავალი მსოფლიო ჩემპიონატების მასპინძლობის განაცხადები განიხილეს.
ამგვარად, რუსეთმა უკრაინის წინააღმდეგ სრულმასშტაბიანი ომის დაწყების შემდეგ პირველად მიიღო ოლიმპიური სპორტის სახეობაში მსოფლიო დონის პირველობის მასპინძლობის უფლება. თავის მხრივ, IWF გახდა პირველი ფედერაცია, რომელმაც 2022 წლის თებერვლის შემდეგ ოკუპანტ ქვეყანას საერთაშორისო მასშტაბის შეჯიბრების ჩატარების შესაძლებლობა მისცა.
ფედერაციის მიერ გამოქვეყნებული გადაწყვეტილებიდან ირკვევა, რომ ანალოგიურ ტურნირს 2029 წელს ინდოეთის ქალაქი აჰმადაბადი უმასპინძლებს. 2028 წლის მსოფლიო ჩემპიონატები ჭაბუკებსა და იუნიორებს შორის შესაბამისად, პრიშტინაში (კოსოვო) და კარაკასში (ვენესუელა) გაიმართება.
"ყველა მიღებული განაცხადი შესანიშნავი იყო და დარწმუნებულები ვართ, რომ ჩემპიონატები თქვენს ქვეყნებში დიდ წარმატებას მიაღწევს", — განაცხადა IWF-ის გენერალურმა მდივანმა, ხოსე კინიონესმა.
გადაწყვეტილების გამოქვეყნების შემდეგ, რუსეთის ძალოსნობის ფედერაციის პრეზიდენტმა, ალექსანდრ ვინოკუროვმა IWF-ს "ნდობისთვის" მადლობა გადაუხადა და აღნიშნა, რომ 2030 წლის მსოფლიო ჩემპიონატი 2032 წლის ოლიმპიური თამაშების ერთ-ერთი საკვალიფიკაციო ტურნირი გახდება.
"რუსეთის ძალოსნობის ფედერაცია გახდა პირველი ოლიმპიური სპორტული ფედერაცია, რომელმაც წლების შემდეგ ქვეყანაში უმაღლესი დონის ოფიციალური შეჯიბრებების დაბრუნება შეძლო", — აღნიშნულია მის განცხადებაში.
ომის დაწყების შემდეგ ოლიმპიური სპორტის სახეობებში არცერთი მსოფლიო ჩემპიონატი რუსეთის ტერიტორიაზე არ ჩატარებულა. კერძოდ, წყლის სპორტის სახეობების 2025 წლის მსოფლიო ჩემპიონატი, რომელიც თავდაპირველად ყაზანში უნდა გამართულიყო, სინგაპურში გადაიტანეს.
იანვარში IWF-მ 23 წლამდე ასაკის რუს სპორტსმენებს საერთაშორისო ტურნირებში დროშითა და ჰიმნით მონაწილეობის ნება დართო, ხოლო ივნისში რუსეთიდან და ბელარუსიდან სპორტსმენებისთვის ყველა შეზღუდვა მოხსნა.
IWF-ის გადაწყვეტილება მოსკოვში 2030 წლის მსოფლიო ჩემპიონატის ჩატარების შესახებ მას შემდეგ იქნა მიღებული, რაც საერთაშორისო ოლიმპიურმა კომიტეტმა (IOC) 2026 წლის ივლისში აღადგინა რუსეთის ოლიმპიური კომიტეტის უფლებამოსილება, ყველა საერთაშორისო ფედერაციას რეკომენდაცია მისცა, მოეხსნათ შეზღუდვები რუსი სპორტსმენების მონაწილეობაზე და მათ გზა გაუხსნა ლოს-ანჯელესის 2028 წლის ოლიმპიადის საკვალიფიკაციო შეჯიბრებებში მონაწილეობისკენ.
